Неговата животна приказна е потсетник дека ниту милијардите на сметката не можат да го заштитат човекот од најголемите животни трагедии.
Данскиот милијардер Андерс Холч Повлсен (54) е еден од најбогатите луѓе во Европа. Тој е успешен претприемач и сопственик на модната империја „Bestseller“, во чии рамки работат познати брендови како „Jack & Jones“ и „Vero Moda“.
Исто така, поседува големи удели во интернет-продавниците за мода „ASOS“ и „Zalando“, а неговото богатство се проценува на повеќе милијарди долари.
Сепак, зад деловниот успех и огромното богатство се крие една од најпотресните семејни приказни.
Имено, во април 2019 година Андерс со сопругата Ен Сторм Педерсен и нивните четири деца бил на одмор во Шри Ланка. Семејството ги минувало велигденските празници во луксузниот хотел „Shangri-La“ во Коломбо, не насетувајќи дека нивното патување ќе се претвори во незамислива трагедија.
На Велигден, 21 април, Шри Ланка беше погодена од серија координирани терористички напади врз цркви и луксузни хотели, во кои животот го загубија повеќе од 250 луѓе.
Меѓу жртвите беа и три од четирите деца на данскиот милијардер. Загинаа неговите ќерки Алма (15) и Агнес (12), како и петгодишниот син Алфред, додека нивната сестра Астрид преживеала.
Само неколку дена пред нападите, Алма на социјалните мрежи објавила фотографија од своите браќа и сестри за време на одморот. На фотографијата Астрид, Агнес и Алфред позирале покрај базен опкружен со палми, а Алма во описот ги нарекла свои „три мали мечиња“.
По трагедијата се огласи портпаролот на неговата компанија „Bestseller“, потврдувајќи дека семејството изгубило три деца и молејќи ја јавноста да ја почитува нивната приватност. На погребот присуствувале илјадници луѓе, меѓу кои биле и денешниот крал Фредерик X, кралицата Мери и нивните четири деца.
Следувале месеци на незамислива тага, а Андерс и Ен се повлекле од јавноста за да се справат со загубата.
Меѓутоа, помалку од една година по трагедијата, во нивното семејство пристигнале две девојчиња.
На 11 март 2020 година, Ен родила близначки, а среќната вест ја соопштила личната секретарка на семејството, Кристине Монстер.
„Ен и Андерс Холч Повлсен станаа родители на две здрави девојчиња, по уредна бременост и породување без компликации. Семејството со сето срце ги пречека овие две мали чуда. Возбудени се што ќе ги запознаваат девојчињата и што тие пристигнаа како потврда на животот“, се наведува во соопштението.
Раѓањето на близначките донело нова радост во семејството кое само неколку месеци претходно доживеало незамислива загуба. Иако ништо не можело да ги надомести Алма, Агнес и Алфред, доаѓањето на девојчињата означило ново поглавје во нивниот живот.
Повлсен инаку е познат по тоа што исклучително ретко зборува за својот приватен живот, и покрај тоа што припаѓа на самиот врв на европскиот деловен свет.
Неговите родители ја основале компанијата „Bestseller“ во 1975 година, а Андерс го презел нејзиното раководење кога имал само 28 години. Со текот на времето, семејниот бизнис прераснал во меѓународна модна империја.
Освен по вложувањата во модната индустрија, познат е и како еден од најголемите приватни земјопоседници во Шкотска, каде што поседува огромни имоти на кои се спроведуваат проекти за обновување на природата и зачувување на животната средина, а во негова сопственост е и фудбалскиот клуб Мидтјиланд.
Со сопругата Ен живее повлечено, а семејството настојува да ја заштити својата приватност од медиумското внимание.
Неговата животна приказна е потсетник дека ниту милијардите на сметката не можат да го заштитат човекот од најголемите животни трагедии. И додека во деловниот свет остварил речиси сè што можел да посака, најтешката загуба во неговиот живот останала онаа што никогаш не може да се надомести со пари.
