Резултатот од амбициозниот потфат не беше само суперавтомобилот EB110, туку и една од најсовремените и најфутуристички автомобилски фабрики во Италија.

Потфатот не опстана долго

Фабриката беше изградена во местото Кампогалијано, недалеку од Модена, а беше проектирана како современ производствен комплекс за новите автомобили на „Bugatti“, меѓу кои централно место заземаше моделот EB110.

Официјално беше отворена на 15 септември 1990 година, а стана препознатлива по впечатливите сини згради, големите стаклени површини и исклучително современите производствени погони.

Во време кога многу автомобилски фабрики имаа исклучително индустриски изглед, овој комплекс изгледаше речиси како да е излезен од научнофантастичен филм, пренесува „Atlas Obscura“.

Меѓутоа, амбициозниот потфат не опстана долго. Компанијата „Bugatti Automobili S.p.A.“ банкротираше во 1995 година, откако во фабриката беа произведени околу 128 примероци од моделот EB110.

Некогашна технолошка гордост

Поранешниот производствен комплекс не беше веднаш препуштен на пропаѓање. За него со години се грижеа поранешните чувари, кои овозможуваа и посети за љубителите на автомобили.

Меѓутоа, откако во 2022 година престана дотогашното одржување, фабриката почна посериозно да пропаѓа. Со текот на времето, таа се најде во фокусот на љубителите на урбаното истражување и фотографите, кои ги привлекуваше необичната глетка на некогашната технолошка гордост.

Меѓу празните хали и руинираните објекти сè уште можат да се насетат исклучителната амбиција и големите планови што стоеја зад проектот EB110.

Може да се замисли како изгледал овој комплекс во времето кога во него се склопувале сосема нови суперавтомобили на „Bugatti“.