Посебно за посебните. „Kia“ изработи уникатен глинен концепт на моделот „Kia EV4 GT“ во природна големина, во чест на својот амбасадор Рафаел Надал. Овој единствен проект ги спојува глината за автомобилско моделирање и материјалот од земјените терени на кои Рафаел Надал освои рекордни 63 титули во поединечна конкуренција. Проектот му беше претставен на Рафа Надал на Мајорка.
Оваа уникатна посвета поврзува два света во кои глината има клучна улога: подлогата на која Надал го изгради своето извонредно спортско наследство и материјалот со кој дизајнерите ги обликуваат и усовршуваат возилата на „Kia“. Со проектот воедно се одбележува и партнерството што трае повеќе од две децении. Извонредните резултати на Надал на земјените терени му го донесоа прекарот „крал на земјата“. На таа подлога освои 63 титули, вклучувајќи рекордни 14 титули во поединечна конкуренција на славната париска земја на Ролан Гарос, каде што оствари некои од своите најважни победи. Токму таа подлога стана креативна појдовна точка за посветата на „Kia“. Моделирањето со глина и натаму е составен дел од развојот на возилата, бидејќи им овозможува на дизајнерите да ги усовршат формата и дизајнот пред производството. Овој креативен пристап е применет на уникатен начин во глинениот концепт „EV4 GT“, изработен од мешавина од материјал од тениски терени и глина за автомобилско моделирање. Изведбата ги задржува основните пропорции и формата на „EV4 GT“ со пет врати.
Белите ленти, какви што користат автомобилските дизајнери, на портокалово-црвената површина на концептот ги имитираат линиите на тениски терен. Посебните детали потсетуваат на пресвртниците во кариерата на Надал. Тука се 63-те титули во поединечна конкуренција на земја, вклучувајќи ги успесите во Монте Карло и Рим, како и рекордните 50 последователно освоени сета на земја и петте сезони што ги заврши како прв тенисер во светот.
„’Kia‘ е покрај мене повеќе од дваесет години, во текот на целата моја кариера, низ подемите и предизвиците. Тоа што ја добив оваа посвета, изработена од материјалот што одбележа голем дел од мојот пат, ми значи исклучително многу. Ова е посебен потсетник на сè низ што поминавме заедно и почестен сум од овој гест“, изјави Рафаел Надал при претставувањето на уникатниот концепт.
Соработката на „Kia“ со Надал започна во 2004 година, кога шпанската подружница на компанијата, „Kia Iberia“, почна да ја поддржува тогашната тениска надеж. По неговата прва гренслем-титула во 2005 година, Надал во 2006 година стана глобален амбасадор на марката „Kia“. Во текот на повеќе од две децении, партнерството се развиваше врз заедничките вредности на истрајност, дисциплина и постојан напредок. Во тој период Надал стана еден од најзначајните спортисти на својата генерација, додека „Kia“ помина низ сопствена трансформација на брендот, дизајнерската филозофија и понудата на електрифицирани возила.
Поддршката на „Kia“ за тенисот го надминува партнерството со Надал. Во 2026 година марката одбележа 25 години соработка со Австралија опен, еден од четирите гренслем-турнири. Преку спортските партнерства и иницијативите на академијата Рафа Надал, „Kia“ ги поврзува љубителите на тенисот низ светот и ја инспирира новата генерација играчи. Впечатливиот, атлетски дизајн на моделот „EV4 GT“ послужи како основа за уникатната посвета на „Kia“ на Рафаел Надал, поврзувајќи ја понудата на спортски електрични возила на марката со едно од нејзините најдолговечни спортски партнерства.
Во рамките на проектот, „Kia“ објавува и серија видеоснимки на својот глобален канал на „YouTube“ и на интернет-страницата на „Kia Europe“. Видеоснимките ги прикажуваат создавањето и претставувањето на уникатната глинена посвета „EV4 GT“ на Рафаел Надал и ги слават неговата легендарна кариера на земјените терени и повеќе од две децении партнерство со „Kia“.
