Новите извештаи наведуваат дека компанијата веќе работи на втора верзија на роботот, под кодното име „Max 2“.
Во рамките на своите напори да влезе во областа на роботиката, „Meta“ направила прототип на хуманоиден робот наменет за помош во домот, пренесува „The Information“. Според извештајот, роботот – интерно наречен „Max“ – бил направен за околу три месеци со помош на кинеската компанија за роботика „Fourier“.
Според изворите на порталот „The Information“, роботот тежи околу 48 килограми и е висок околу 1,5 метри. Однадвор, прототипот наводно има екран што може да прикажува изрази на лицето, вграден звучник и раце дизајнирани за подигање мали предмети. За внатрешниот хардвер, „Meta“ се одлучила за чиповите „Nvidia Jetson Thor“, кои го управуваат роботот, се наведува во извештајот.
Во извештајот на „The Information“ се наведува дека сè уште не е одреден датум за лансирање верзија за масовниот пазар, но дека „Meta“ од септември веќе работи на втор прототип под кодното име „Max 2“. Се додава и дека технолошкиот гигант внесува измени во дизајнот на трупот и шаките на роботот, како и дека додава проектор и дополнителни сензори што би му помогнале полесно да се движи по скали.
Во обид да се пробие на пазарот на хуманоидни роботи, „Meta“ ги започна активностите уште минатата година, откако „Bloomberg“ објави дека компанијата формирала нов тим со задача да создаде роботски хардвер чија крајна цел би била извршување домашни работи. Претходно годинава, „Meta“ купи стартап познат по развојот на вештачка интелигенција специјализирана за роботика.
