Американската војска извршила ограничени напади врз иранскиот остров Кешм, потврдија тројца американски претставници за Си-Ен-Ен (CNN). Тие ги опишаа нападите како одбранбена акција насочена кон заштита на американските сили и средства во регионот.

Еден од претставниците изјави дека американскиот напад уследил по инцидент во кој Иран отворил оган врз американско летало. Се чини дека ова не е борбена операција од голем обем, каква што претходно разгледуваа американските власти. Весникот „Волстрит џурнал“, кој прв извести за операцијата, напомена дека слични напади биле изведувани и во минатото, но во тајност.

„Ова беше одбранбена мерка преземена бидејќи Иранците употребија ракети земја-воздух против американски имот“, изјави друг американски претставник. Сепак, оваа нова воена акција – која се случува непосредно пред денот на изборите – служи како потсетник дека ситуацијата со Иран останува нерешена и дека можноста за понатамошни непријателства е сè уште многу реална.

Кешм игра клучна улога во одржувањето на контролата врз Ормускиот теснец.

Лице запознаено со ситуацијата изјави дека администрацијата намерно не го објавила нападот, сакајќи да избегне впечаток дека станува збор за операција од поголем обем отколку што таа навистина била. Изворот додаде дека целта на нападот била заштита на американски имот во регионот.

Иранската новинска агенција „Фарс“, која е блиска до властите, објави дека во раните утрински часови во вторникот (по локално време) на островот Кешм се слушнале „неколку експлозии“. Експлозии слушнале и жителите на блискиот остров Хенгам, како и на пристанишниот град Бандар Абас.

Островот Кешм се наоѓа на околу 22 километри од Бандар Абас и игра важна улога во напорите на Иран да ја задржи контролата врз сообраќајот низ Ормускиот теснец – витална рута за глобалното снабдување со енергенси. Пред почетокот на војната, низ овој теснец дневно поминуваа приближно 20 милиони барели нафта. Американската војска и претходно, во текот на војната, го има нападнато овој остров.

Трамп: Можеби ќе треба да ја нападнеме планината Пикакс

Нападот се случи откако американскиот претседател Доналд Трамп изјави дека дипломатските контакти со Техеран сè уште траат. На социјалните мрежи тој напиша дека би можел да се постигне договор.

Во интервју за „Фокс њуз“, емитувано синоќа, Трамп не се осврна директно на извештаите за нови напади во Иран. Сепак, тој напомена дека САД „можеби ќе мора да ја нападнат“ планината Пикакс – локација за која постои сомневање дека претставува подземен нуклеарен објект, каде што, според израелските проценки, Техеран чува дел од своите залихи на збогатен ураниум, како и напредни центрифуги за збогатување.

„Тоа не е ништо страшно. Можеме да го изведеме буквално за еден час. Односно, кога и да посакаме – во секој момент“, истакна Трамп. Од почетокот на војната, американскиот претседател во повеќе наврати ја споменуваше можноста за ваков напад. Во јули, тој изјави дека САД најверојатно „многу наскоро“ ќе ја нападнат планината Пикакс.