Колку пари му се потребни на човек во Европа за да живее без секојдневно да размислува за сметките, храната и основните трошоци? Одговорот зависи од земјата, цените, големината на домаќинството, но и од тоа дали некој поседува сопствен стан или мора да плаќа кирија. Сепак, новата споредба на „Euronews Business“ покажала колкав месечен нето-приход на домаќинството е потребен за да се достигне прагот што го означува почетокот на повисоката средна доходовна група.

Според ова истражување, на лице кое живее само во Македонија му се потребни 603 евра месечно за да го достигне ова ниво на приходи. На прв поглед, оваа сума изгледа значително пониска во споредба со одредени европски земји, но важно е да се има предвид дека станува збор за споредба со медијалниот приход во секоја земја, а не за универзална сума што гарантира безгрижен живот.

Колку пари се потребни за удобен живот во Европа?

„Euronews Business“ споредил 34 европски земји за да утврди колку пари му се потребни на поединецот за да го достигне стандардот на приходи што е повисок од оној на повеќето жители во неговата земја. Како граница ја зеле сумата што е за 50 отсто повисока од средниот приход во таа држава. Со други зборови, истражувале колкава заработка е потребна за некој да се најде во групата со повисоки примања во однос на остатокот од населението.

Во Европската Унија, медијалниот еквивалентен расположлив приход во текот на 2025 година изнесувал 1.912 евра месечно. За едно возрасно лице кое живее само да го достигне прагот од 150 отсто, му биле потребни 2.867 евра месечно.

Разликите меѓу државите се огромни. Најниската сума е забележана во Македонија, каде што се потребни 603 евра месечно, додека на спротивниот крај на листата е Швајцарија со дури 6.491 евро. Во рамките на Европската Унија, највисок праг има Луксембург со 6.256 евра, а најнизок Романија со 1.023 евра месечно.

Повеќе од 4.000 евра месечно се потребни и во:

• Норвешка (5.240 евра),
• Австрија (4.568 евра),
• Данска (4.524 евра),
• Ирска (4.392 евра) и
• Холандија (4.308 евра).

Кога станува збор за најголемите европски економии, Германија е на прво место со 3.611 евра, а по неа следуваат Франција со 3.307, Италија со 2.758 и Шпанија со 2.546 евра.

Тоа значи дека на лице кое живее само во Германија му се потребни дури 1.065 евра повеќе месечно отколку на лице во Шпанија за да ја достигне истата релативна доходовна положба.

Македонија со најнизок праг во Европа: Потребни се 603 евра месечно

Македонија се наоѓа на самото дно на листата на 34 европски земји, со најнизок пресметан праг за достигнување на повисоката средна доходовна група – 603 евра месечно за лице кое живее само.

Покрај Македонија, во групата земји во кои се потребни помалку од 1.000 евра месечно се и Албанија со 723 евра, Турција со 755 евра, Црна Гора со 825 евра и Србија со 975 евра.

Заедно со Македонија, сите овие држави се наоѓаат меѓу кандидатите за членство во Европската Унија.

Сепак, тоа не значи дека во Македонија со 603 евра може без проблем да се покријат сите трошоци и да се живее комотно. Оваа сума претставува статистички праг во однос на распределбата на приходите во земјата, а не процена за тоа колку пари навистина му се потребни на секој поединец за домување, храна, превоз, излегувања и заштеда.

Колку пари му се потребни на еден пар или на семејство со деца?

Интересно е и тоа што за две лица кои живеат заедно не се пресметува дека им е потребен двојно поголем приход од оној на лице кое живее само. Причината е што тие делат одредени трошоци, како киријата и сметките за струја и греење.

Според методологијата на „Eurostat“, на пар без деца му е потребен 1,5 пати поголем приход од оној на возрасно лице кое живее самостојно, додека за семејство со две деца помлади од 14 години се користи коефициент 2,1.

Кога овие коефициенти ќе се применат на пресметаниот праг за Македонија, се добиваат приближно 904 евра месечно за пар и 1.266 евра за семејство со две деца.

Парите не се единственото мерило за удобен живот

Експертите предупредуваат дека приходот сам по себе не може да покаже колку е некој навистина финансиски сигурен. Голема улога имаат и заштедите, имотот, сопственоста на недвижности, но и местото во кое живее лицето.

Така, некој со помала плата, но со сопствен стан и заштеда, може да има значително помалку финансиски грижи од лице кое заработува повеќе, но секој месец издвојува голем дел од приходите за кирија и отплата на долгови.

Професорот Коен Каминала од Универзитетот во Лајден истакнал дека удобниот живот не треба да се сведе само на можноста за плаќање на сметките. Тој подразбира и соодветно домување, храна, енергија и превоз, но и можност за учество во општествениот живот, повремено уживање во некои задоволства и оставање пари настрана.

Особено е важно домаќинството да може да поднесе неочекуван трошок или привремено губење на приходите, без веднаш да се најде во сериозни финансиски проблеми.

Поради тоа, прагот од 150 отсто од медијалниот приход треба да се набљудува како показател за релативната положба на домаќинството во сопствената земја, а не како гаранција дека некој со тие примања ќе живее без финансиски грижи.