Три европски организации за заштита на животната средина упатија официјално предупредување до француската компанија Groupe SEB, сопственик на брендот „Tefal“, барајќи од неа да престане да користи соединенија PFAS, познати како „вечни хемикалии“, пренесува „Euronews“.
Организациите ClientEarth, Générations Futures и Notre Affaire à Tous реагираа во момент кога во Брисел се водат преговори за нови европски прописи со кои би се ограничила употребата на овие постојани загадувачи.
Иако целосната забрана сè уште не е стапена во сила, притисокот врз производителите расте. Експертите предупредуваат дека безбедноста на нелепливите премази мора да се проценува во текот на целиот животен циклус на производите.
Професорот Ханс Петер Арп од Норвешкиот универзитет за наука објасни дека материјалот може да биде стабилен при употреба во кујната, но дека неговото производство и подоцнежното отстранување може да доведат до ослободување штетни остатоци што ги загадуваат водата и почвата.
Од Groupe SEB соопштија дека ќе ја анализираат добиената документација и ќе одговорат во согласност со законот. Компанијата истакнува дека нејзиното работење е усогласено со важечките национални и европски прописи.
Групацијата во текот на 2025 година се соочи и со судски постапки поради наводи дека на погрешен начин ги претставувала своите нелепливи премази како целосно безбедни, истовремено минимизирајќи го влијанието врз животната средина од нивното производство.
ЕУ подготвува построги правила
Европската Унија подготвува пакет прописи за ограничување на соединенијата PFAS во производите за широка потрошувачка. Сепак, хемиската индустрија лобира за воведување исклучоци, додека предлогот за забрана на тавите со нелеплив слој во Франција беше повлечен од конечниот нацрт по притисокот од производителите.
Соединенијата PFAS се користат од средината на минатиот век поради нивната отпорност на топлина, вода и маснотии. Поради тоа, ги има во бројни производи, од кабаници и амбалажа за храна до производи за лична хигиена.
Нивната долготрајност претставува сериозен еколошки проблем: во Европа се идентификувани повеќе од 23.000 контаминирани локации.
Организациите за заштита на животната средина наведуваат дека постојат алтернативи за употреба во домаќинствата, како садовите од леано железо и не'рѓосувачки челик, и ги повикуваат производителите да ги стават заштитата на здравјето и природата пред финансиските интереси.
