Пораснал играјќи покрај Кристијано Роналдо, кој за него велел дека е поголем талент од самиот него, но никогаш не успеал да ја оствари кариерата онака како што замислувал.
Откако ја завршил фудбалската кариера во полскиот нисколигаш ЛЗС Старовице, Фабио Паим (38) пред неколку години целосно го променил својот животен пат и станал порно актер. Во меѓувреме се соочил со бројни обвиненија, а сега го очекува нов судски процес бидејќи е обвинет за силување.
Португалскиот фудбалер и поранешен играч на Челси е обвинет за силување студентка, откако насилно влегол во нејзиниот стан. Како што пишува „Сан“, тој е обвинет и за оштетување туѓ имот и неовластено влегување во стан, а сериозните обвинувања ги изнела неименувана 20-годишна девојка. Судењето на поранешниот португалски крилен напаѓач треба да започне на 18 ноември.
Се наведува дека на 20 април 2023 година провалил во стан во градот Фаро, во регионот Алгарве. Според пишувањето на локалните медиуми, кое го пренесува британскиот весник, потоа ја повлекол жената за коса, ја турнал кон ѕидот и ја силувал.
Според извештаите, наводната жртва била цимерка на жена со која Паим претходно се запознал во кафуле. Таа наводно му се спротивставила кога го забележала како се обидува да влезе во една од собите.
Присуството на Паим на местото на настанот, според наводите, било потврдено со ДНК-анализа.
Паим ја поминал својата фудбалска школа во Спортинг, за чиј прв тим никогаш не дебитирал. Една сезона поминал во Б-тимот на Челси, а забележал и 42 настапи за младинските селекции на португалската репрезентација. Сепак, никогаш не заиграл за сениорската репрезентација на Португалија.
Откако во 2003 година потпишал за својот поранешен клуб Манчестер Јунајтед, Роналдо изјавил: „Ако мислите дека јас сум добар, само почекајте да го видите Фабио Паим“.
Наводно, Паим бил толку голем талент и еден од најперспективните млади фудбалери на својата генерација што уште на 13-годишна возраст заработувал повеќе од 5.000 евра неделно, со дополнителен годишен бонус од 155.000 евра.
Во август 2008 година заминал на позајмица во Челси, но во текот на четирите месеци поминати таму настапувал само за резервниот тим, пред да биде испратен на позајмица во португалскиот клуб Рио Аве.
Фудбалската кариера ја завршил пред пет години во нисколигашот ЛЗС Старовице, по што започнал нова кариера како порноактер.
Тогаш тоа го објаснил со следните зборови:
„Во Португалија се појави вест дека сум глумел во порнографски филм. Сите полудеа. Во еден поткаст изјавив дека мојот сон е да станам порно актер и веднаш добив многу понуди. Завршив на вестите, бев на насловните страници на весниците... А не направив ништо. Бидејќи сите веќе зборуваа за тоа, си помислив зошто навистина да не снимиме филм. И го направив тоа. Ќе кажам само едно: убаво е да имаш секс и притоа да бидеш платен за тоа“, изјавил тогаш Паим.
Сепак, ова не е првпат тој да има проблеми со законот. Претходно бил обвинет за силување во 2012 и 2015 година, но ниту еден од тие случаи не завршил со судење. Во 2019 година бил уапсен под сомнение за препродажба на дрога, по што бил осуден на условна казна.
Тој тврдел дека вториот случај со обвинението за силување бил покренат од жена која лажно го обвинила со цел да извлече пари од него.
