Контејнерски брод пловејќи под либериско знаме бил погоден од три поморски дрона во Црното Море, близу до Бугарија, што предизвика реакции од министерот за одбрана на Бугарија и засилени регионални безбедносни разговори помеѓу Бугарија, Турција и Романија.
Контејнерски брод што пловел под знамето на Либерија бил погоден од три поморски дрона во Црното Море, на околу 40 километри од Шабла, на североисточниот брег на Бугарија, соопшти денеска бугарскиот министер за одбрана Димитар Стојанов.
Стојанов го потврдил нападот за време на трилатералната средба во Софија со турскиот министер за одбрана Јашар Ѓулер и романскиот министер за одбрана Штефан Раду-Опреа, како и со началниците на генералштабовите на трите земји, кои разговарале за регионалната безбедност.
Специјализираниот портал „Maritime.bg“ објави дека бил нападнат бродот „Contship Jet“, кој пловел под знамето на Либерија, а претходно тргнал од израелското пристаниште Хаифа кон романското пристаниште Констанца.
Според информациите на порталот, танкер бил испратен да му помогне на бродот, додека екипажот се евакуирал на спасувачки сплавови.
Првично било објавено дека екипажот го напуштил бродот, но засега нема информации за состојбата на членовите на екипажот, ниту за размерите на штетата на пловилото.
„Додека траеше оваа средба, контејнерски брод беше погоден со три поморски дрона во крајбрежните води. Локацијата се наоѓа на приближно 21 морска милја од Шабла“, изјави Стојанов.
Тој им се заблагодари на турскиот и на романскиот колега што за кратко време прифатиле да учествуваат на средбата поради влошувањето на безбедносната состојба во Црното Море.
Стојанов оцени дека нивното присуство ја покажува заедничката определба на трите земји да одговорат на регионалните предизвици.
Бугарија, Романија и Турција усвоија заедничка изјава со која ги осудуваат нападите врз цивилниот поморски сообраќај.
Стојанов оцени дека овие инциденти претставуваат опасна ескалација и сериозно ја загрозуваат безбедноста на пловидбата.
„Повикуваме на итен прекин на нападите што ги загрозуваат трговските бродови, поморската инфраструктура и безбедноста на поморските активности“, изјави Стојанов.
