Најголемиот британски тренер во историјата, сер Алекс Фергусон (84), минатиот викенд беше навредуван од навивач на Лидс на стадионот Еланд Роуд. Додека трофејниот стручњак се движел кон ложата на стадионот на омразениот ривал на неговиот клуб, приврзаник на домашниот тим му дофрлил навредлив збор од непосредна близина.

Шофер го довезол со полициска придружба

Автомобилот на сер Алекс Фергусон, управуван од шофер, во неделата пристигнал на Еланд Роуд во придружба на четворица полицајци на мотоцикли. Двата клуба не сакале ништо да препуштат на случајноста кога станува збор за безбедноста на Фергусон на едно од најжестоките дербија во англискиот фудбал, па се погрижиле легендарниот менаџер на Јунајтед да влезе на стадионот без никакви инциденти.

Меѓутоа, и покрај напорите на полицијата и обезбедувањето на Лидс, еден навивач вербално го навредувал Фергусон, што може да се види на снимката која кружи на социјалните мрежи. Сè се случило додека шкотскиот стручњак на полувремето се движел кон директорската ложа од своето место, каде што седел со поранешниот економ на клубот, Алберт Морган.

На видеоснимката се гледа дека Фергусон носи бастун за одење, бидејќи закрепнува од проблеми со Ахиловата тетива, поради што мора да носи и заштитна ортопедска чизма.

Зошто толку го мразат во Лидс?

Причината е јасна: Фергусон со својот Јунајтед со децении го победуваше, а понекогаш и го декласираше Лидс во изразеното ривалство меѓу двата клуба од градови оддалечени педесетина километри. На 36 натпревари против Лидс, Јунајтед на Фергусон победил дури 20 пати и доживеал само пет порази.

Колкава е омразата меѓу двата клуба можеше да се види деновиве и во англиските медиуми. Поранешниот менаџер на Лидс и актуелен селектор на Канада, Џеси Марш, го нарече Јунајтед „шљам“ („the scum“) кога во понеделникот на социјалните мрежи ѝ честиташе на екипата на Даниел Фарке за прикажаната игра во неделното реми меѓу Лидс и Јунајтед (1:1).