Американскиот претседател Доналд Трамп во петокот им раскажувал на своите поддржувачи за наводниот обид еден од океаните да го добие неговото име, откривајќи дека Гугл ја одбил неговата идеја.

Говорејќи на предизборен митинг во сојузната држава Џорџија, Трамп рекол дека на претставниците на интернет-гигантот им предложил Атлантскиот или Тихиот Океан да биде преименуван во „Океан Трамп“.

Според неговото раскажување, претставниците на компанијата реагирале остро.

„Доста ни е. Ова е премногу. Повеќе нема ништо да менуваме“, наводно му одговориле тие.

Претходни промени на географски имиња

Трамп и претходно преземаше иницијативи за промена на географски имиња. Во 2025 година, со извршна наредба, Мексиканскиот Залив го преименуваше во „Американски Залив“, а во август годинава истото го направи и со езерото Онтарио, на границата меѓу САД и Канада, нарекувајќи го „Американско Езеро“.

Гугл мапс ги прифати двете промени за корисниците во Соединетите Американски Држави.

Гугл наводно ја одбил идејата

Трамп им рекол на присутните дека на Гугл му испратил карта на која океанот бил означен како „Трампов Океан“, но дека претставниците на компанијата го одбиле предлогот.

„Господине, слушајте, во ред, ова не можеме да го направиме. Океаните се нешто друго. Тие се протегаат низ териториите на многу, многу земји. Тоа не можеме да го направиме“, раскажал Трамп, пренесувајќи ги наводните зборови на претставниците на компанијата.

Трамп призна дека се шегувал

Американскиот претседател рекол дека овојпат само се шегувал, но додал дека тоа не била најлошата идеја што некогаш ја имал. Засега нема потврда дека разговорот со Гугл навистина се случил.

Трамп во повеќе наврати навестувал дека би сакал некој океан да го добие неговото име. Тој ја изнел и идејата Ормускиот Теснец да биде преименуван во „Трампов Теснец“, очигледно со цел да го испровоцира Иран, со кој Соединетите Американски Држави се во војна.