Португалија често се смета за една од најгостопримливите и најпријатните земји за престој во светот, а меѓународните истражувања и анкети редовно ги вбројуваат Португалците меѓу омилените домаќини на туристите. Затоа не изненадува што Порто ја понесе титулата „најљубезен град во Европа“.

Признанието му го доделија читателите на списанието „Конде Наст Травелер“ во рамките на наградите „Readers‘ Choice Awards 2026“, при што Лисабон го освои второто место во истата категорија, пренесува „Јуроњуз“.

Целта на гласањето беше да се издвојат градовите во кои „гостопримливоста е најизразена“ и во кои „локалните жители се подготвени да помогнат, без разлика дали се обидувате да го разберете менито во соседниот ресторан или збунето го барате патот во метрото“.

Признанието доделено на Порто, познат и под прекарот „Инвикта“, „го одразува значителниот пораст на популарноста на Порто како идеална дестинација за краток градски одмор, како за љубителите на добрата храна, така и за вљубениците во културата“, објаснува списанието, истакнувајќи ја автентичноста на градот и неговата опуштена атмосфера.

„Опуштете се на прекрасниот плоштад украсен со традиционалните керамички плочки азулежос или споделете петискос, мали порции локални специјалитети, со локалните жители во ресторан во соседството“, препорачува „Конде Наст“.

„Брзо ќе сфатите како токму великодушната гостопримливост го претворила Порто во дестинација во која многумина од нас постојано се враќаат“, додава списанието.

Лисабон на второто место

Веднаш зад Порто се наоѓа Лисабон.

„Малку европски градови се толку живописни како португалската престолнина облеана во сонце, позната по тоа што е изградена на седум ридови кои се издигнуваат покрај бреговите на реката Тежо“, наведува списанието, опишувајќи го Лисабон како „прекрасен град со кривулести улички, емотивното фадо и кремастите колачиња пастеиш де ната“.

„Но, она што всушност сè поврзува се луѓето. Младешката и инклузивна атмосфера се чувствува во неговите стрмни квартови, а патниците имаат многу можности да станат дел од градскиот живот“, се истакнува во текстот.

Списанието особено препорачува да се доживее живописната култура на кафулињата, каде што локалните жители се собираат за да уживаат во утринското еспресо, како и посета за време на Фестивалот на свети Антониј, кога поплочените улици се претвораат во места за големи забави на отворено.

Меѓу петте најљубезни европски градови се најдоа и Амстердам во Холандија, Стокхолм во Шведска и Валета на Малта.

Ова се 15-те најљубезни градови во Европа

Според изборот на читателите на списанието „Конде Наст Травелер“ за 2026 година, листата изгледа вака:

1. Порто, Португалија

2. Лисабон, Португалија

3. Амстердам, Холандија

4. Стокхолм, Шведска

5. Валета, Малта

6. Единбург, Шкотска

7. Виена, Австрија

8. Краков, Полска

9. Палма, Шпанија

10. Гранада, Шпанија

11. Џенова, Италија

12. Корк, Ирска

13. Париз, Франција

14. Рим, Италија

15. Рејкјавик, Исланд.