Австрискиот „Marchi Mobile“ е познат по производството на кампери кои изгледаат како да се дизајнирани во детска градинка или како да се дел од сценографијата на научнофантастичен филм.
Серијата „Marchi Mobile eleMMent“ постои повеќе од една деценија, но и натаму привлекува погледи секогаш кога ќе помине. Препознатливиот изглед на моделот „eleMMent“ е силно инспириран од работата на индустрискиот дизајнер Луиџи Колани (Luigi Colani) од седумдесеттите и осумдесеттите години на минатиот век.
Колани, кој почина во 2019 година, беше познат по својата опсесија со необичен, аеродинамичен дизајн.
Како изгледа кампер од три милиони евра?
Самиот „eleMMent“ има препознатливо кружно ветробранско стакло и заоблени форми кои ги направија дизајните на Колани единствени. Предниот дел го красат голем отвор за довод на воздух и кружни предни светла. Со должина до 13,75 метри, камперот „eleMMent“ нуди внатрешност која е подеднакво приспособлива и луксузна. Внатре има пространа дневна соба со две софи и маса за одмор, како и шанк. Целосно опремената кујна има сè што ви е потребно, пренесува „Revija HAK“.
Каков луксуз нуди внатрешноста на камперот?
Бањата вклучува дури и спа-третман, додека главната спална соба има голем брачен кревет („king size“), а ако ви треба повеќе простор, постои посебен гардеробер за складирање облека. Кабината е преполна со прегради за складирање предмети, а подното греење е дел од стандардната опрема. Со два резервоара од по 600 литри за чиста и отпадна вода, како и два генератора, обезбедена е голема автономија.
„Sky Lounge“ е дополнителна функција која го претвора покривот во приватна тераса за опуштање и уживање во погледот. Во зависност од тоа како ќе го замислите, површината на дневниот престој може да се движи од 33 до 130 квадратни метри, што е повеќе од просечен европски стан. Компанијата нуди и различни конфигурации за ВИП-превоз или посебни настани. Една опција вклучува кабина налик на автобус со 22 седишта со греење, обложени со кожа, од кои секое е опремено со сопствен екран за максимална удобност и забава.
Колку чини „eleMMent“ и какви се неговите перформанси?
Засега не е познато колку од овие возила има на патиштата. Сигурно ги нема многу, а цените достигнуваат и до три милиони евра. Камперот е поставен на шасија на „Volvo“, со мотор од 600 КС и максимална брзина од 150 км/ч, пишува „Carscoops“.
