Градоначалникот на Киев, Виталиј Кличко, предупреди дека засилените руски напади врз украинскиот главен град го загрозуваат снабдувањето со електрична енергија и греење пред почетокот на зимата. Во изјава за „Франс прес“, тој истакна дека руските напади врз згради и критична инфраструктура значително го отежнуваат секојдневниот живот.
„Секој ден носи нови извештаи за уништени згради и луѓе кои се ранети или трагично загинати додека гранатирањето на нашиот град се интензивира. Денес, станува збор за опстанок“, изјави Кличко.
Според извештаите на „Франс прес“, Русија во последните недели ги засили ракетните напади и нападите со беспилотни летала врз Киев, таргетирајќи мостови и енергетски капацитети.
Честите напади врз украинската електроенергетска мрежа предизвикуваат прекини во снабдувањето со струја и ја зголемуваат загриженоста за условите во текот на претстојната зима. Минатата зима, некои жители на Киев со денови остануваа без греење или струја додека температурите паѓаа до -20 Целзиусови степени.
Кличко ги повика граѓаните кои имаат можност, да размислат за привремен престој кај пријатели или роднини надвор од главниот град. Сепак, тој нагласи дека не повикува на целосна евакуација на Киев.
„Тоа е целта на Путин – сите да го напуштиме градот и да му ги препуштиме и Киев и нашата земја“, рече тој, појаснувајќи дека мисли на рускиот претседател Владимир Путин.
Руското Министерство за одбрана во средата соопшти дека неговите сили извршиле „масовен напад“ врз воено-индустриски капацитети во Киев и во други украински региони.
Украина со месеци се соочува со недостиг на опрема за противвоздушна одбрана, што го отежнува одговарањето на руските напади. Украинскиот претседател Володимир Зеленски и други високи функционери постојано повикуваат на испорака на дополнителна воена опрема и меѓународна помош за зајакнување на одбраната на земјата.
Денес
