Токму од тој период потекнува нивниот конфликт за кој со децении се зборувало, а Сталоне сега, 52 години подоцна, ја открил својата верзија за тоа што се случило на снимањето на филмот „The Lords of Flatbush (Господарите од Флатбуш).

Во новите мемоари „The Steps“ (Чекорите), објавени на 29 септември, 80-годишниот Сталоне се присетил на аудициите за филмот од 1974 година, на кои се појавиле и Ричард Гир и Роберт де Ниро.

Со Де Ниро, тврди тој, во почетокот сè одело добро. Уживал во импровизациите и нивниот обид да се надминат еден со друг, но со Гир ситуацијата набрзо тргнала во поинаква насока, пишува магазинот „Пипл“.

Тензиите започнале уште за време на импровизацијата

Според зборовите на Сталоне, Гир за време на една импровизирана сцена го фатил за маицата, при што ноктите му се забиле во кожата. Го предупредил да престане, но тврди дека Гир го повторил истото и при следниот обид.

Сталоне тогаш му се обратил на режисерот Стивен Верона и го прашал дали смее да реагира онака како што би реагирал во реалниот живот. Кога режисерот го прашал што би направил, Сталоне му одговорил дека би му „ги избил забите“ на Гир. Верона кратко му порачал да не го прави тоа.

Тогаш не дошло до судир, но тензијата меѓу двајцата млади актери не исчезнала. Ситуацијата ескалирала за време на една пауза за ручек. Сталоне и Гир јаделе во автомобил на снимањето, а Сталоне тврди дека претходно го предупредил да не направи неред.

Сè ескалирало поради маснотија од пилешко

Според неговото сеќавање, маснотијата од пилешкото што го јадел Гир му се истурила врз ногата. Сталоне тогаш го изгубил трпението. Во мемоарите тврди дека го удрил Гир со лакт во градите, излегол од автомобилот, се приближил до неговата страна и го извлекол од задното седиште. Гир наводно му рекол дека не сака физички конфликт, на што Сталоне му одговорил: „Предоцна“, пишува „Пипл“.

Режисерот Верона застанал меѓу нив, а Сталоне вели дека тогаш станало јасно дека двајцата актери повеќе не можат заедно да продолжат да работат на филмот.

На крајот, Гир го напуштил проектот, а неговата улога ја презел Пери Кинг. Роберт де Ниро исто така се повлекол од проектот поради друг ангажман, додека на актерската екипа ѝ се придружил Хенри Винклер. Токму со Винклер, Сталоне подоцна развил долгогодишно пријателство.

Нивната нетрпеливост наводно не завршила на снимањето

Инцидентот на снимањето очигледно не бил и последната напната епизода меѓу Сталоне и Гир. Британскиот музичар Елтон Џон во своите мемоари од 2019 година опишал уште една необична средба меѓу двајцата актери, овојпат на вечера на која присуствувала и принцезата Дијана.

Според верзијата на Џон, Гир и Дијана таа вечер добро се согласувале, што на Сталоне наводно не му се допаднало. Џон тврдел дека актерите во еден момент се нашле во ситуација која изгледала како повторно да може да заврши со физичка пресметка.

Повеќе од половина век по нивниот прв конфликт, Сталоне сега решил детално да ја раскаже својата страна од приказната. Гир, кој денес има 77 години, засега јавно не одговорил на тврдењата од мемоарите на Сталоне.