Во сите италијански училишта од денес стапува на сила забрана за носење бурки и никаби, дел од новата уредба на десничарската влада предводена од премиерката Џорџа Мелони. Покрај забраната за покривање на лицето, воведено е и ограничување на квотата на ученици со странско потекло што не зборуваат добро италијански, со цел подобрување на образовниот процес и интеграцијата.
Од денес, во сите италијански училишта стапува на сила забраната за покривање на лицето, откако претседателот Серџо Матарела потпиша уредба од десничарската влада на премиерката Џорџа Мелони, соопшти кабинетот на италијанскиот претседател. Според уредбата, лицата на учениците мора да останат препозналиви, со што практично се забрануваат исламските превези што целосно го покриваат лицето, како што се бурката и никабот.
Почнувајќи од учебната 2027/2028 година, се воведува и ограничување според кое децата со странско потекло, кои не го зборуваат италијанскиот јазик доволно добро, не смеат да сочинуваат повеќе од 30 отсто од учениците во паралелките од прва година на сите нивоа на образование. Мерките беа воведени преку итна уредба и сега мора да бидат ратификувани од парламентот во рок од 60 дена.
Квотата се однесува на деца кои немаат италијанско државјанство, не се родени во Италија и не посетувале италијанска градинка најмалку две години. Во средните училишта, учениците мора да имаат завршено најмалку три години школување во Италија за да бидат изземени од оваа квота.
Од родителите кои имаат значителни тешкотии со италијанскиот јазик може да се побара да посетуваат јазични курсеви, доколку тоа ја попречува комуникацијата со училиштето на нивното дете. Премиерката Мелони ги најави мерките на почетокот на септември, а владата ја одобри уредбата кратко потоа.
Мелони ја предводи италијанската коалиција од три партии – составена од екстремно десничарски и конзервативни партии – уште од 2022 година. Таа победи на изборите со ветување дека ќе заземе построг став кон мигрантите.
Нејзината партија, „Браќа на Италија“ (Fratelli d’Italia), продолжува да води во анкетите пред изборите што се очекуваат следната година. Сепак, коалицијата неодамна се најде под притисок од новоформираната партија „Национална иднина“ (Futuro Nazionale), предводена од поранешниот генерал Роберто Ваначи, која се залага за уште построг пристап кон миграцијата.
фото/ЕПА
