Министерот Бесар Дурмиши говореше на конференции во Будва и Цетиње за важноста на Заедничкиот регионален пазар во Западен Балкан и неговата улога во забрзување на економското приближување кон Европската Унија, истакнувајќи дека соработката меѓу регионалните економии носи конкретни придобивки за компаниите.
Министерот за економија и труд, Бесар Дурмиши учествуваше на конференција во Будва и на министерски состанок во Цетиње, во рамките на Берлинскиот процес. На двата настана се разговараше за зајакнување на Заедничкиот регионален пазар и за забрзување на економското приближување на Западен Балкан кон Европската Унија.
Дурмиши истакна дека регионот веќе има индустриски капацитети, квалификувана работна сила и компании поврзани со европските производители, но дека соработката меѓу економиите сè уште е под својот потенцијал. Според него, следниот чекор е домашните компании да се поврзат во регионални синџири на снабдување и да развиваат производи и услуги со поголема додадена вредност.
„Нашата цел не е Северна Македонија да биде само локација за производство. Сакаме домашните компании да станат посилни добавувачи, да развиваат сопствени производи и технологии и да имаат поголемо учество во европските синџири на вредност. За тоа ни се потребни подобро поврзан регионален пазар, квалификувани луѓе и повеќе инвестиции во иновации“, рече Дурмиши.
На министерскиот состанок тој нагласи дека спроведувањето на договорените мерки во рамките на Заедничкиот регионален пазар треба да стане приоритет. Заемното признавање на документи и квалификации, прифаќањето на електронските потписи и поврзувањето на дигиталните системи, како што посочи, ќе им заштедат време и трошоци на компаниите што работат на повеќе пазари во регионот.
„Веќе имаме стратегии, договори и акциски планови. Сега треба да покажеме резултати што компаниите и граѓаните ќе ги почувствуваат. Кога една постапка ќе
може да се заврши дигитално, а документ издаден во една економија ќе се признава во друга, регионалната интеграција ќе стане реална придобивка за бизнисот“, истакна министерот.
Дурмиши порача дека посилниот регионален пазар ќе им овозможи на компаниите полесно да растат и да привлекуваат инвестиции, а на економиите побрзо да се приближуваат кон единствениот европски пазар.
