Руски воен сателит изведе необичен маневар приближувајќи се на само неколку стотици метри од комерцијален сателит кој ѝ помага на Украина, предизвикувајќи загриженост за можни намери како следење или попречување.
Руски сателит изведе редок маневар, приближувајќи се на помалку од 1,5 километри до комерцијален сателит за набљудување на Земјата, кој, според достапните информации, се користи за цели поврзани со националната безбедност – вклучително и за Украина – пренесува CNN.
Не е сосема јасно што рускиот сателит „Космос 2612“ имал намера да постигне. Сепак, „ЛеоЛабс“, компанија што ги следи активностите во вселената, наведе дека ваквото однесување одговара на „операции за приближување и средба“ – маневри при кои две вселенски летала се обидуваат физички да се доближат едно до друго во орбитата.
„Иако намената останува нејасна, ова однесување бара дополнително следење“, изјавија од „ЛеоЛабс“.
Астрофизичарот и аналитичар за вселенски прашања, Џонатан Мекдауел, на социјалните мрежи истакна дека, иако средбите меѓу вселенски летала во орбитата се вообичаени, постапките на „Космос 2612“ би можеле да претставуваат прв случај во кој едно вселенско летало се приближува до друго без овластување.
Со сателитот за набљудување на Земјата, Iceye-X36, управува компанијата Iceye – мултинационална компанија со канцеларии во САД, Финска и други земји низ Европа и Азија.
Во понеделникот, компанијата соопшти: „Свесни сме за ситуацијата и внимателно ја следиме. Архитектурата на нашата сателитска констелација е дизајнирана за континуитет и отпорност“. Портпарол на компанијата одби да даде дополнителен коментар.
Iceye-X36 користи технологија на радар со синтетичка апертура (SAR). НАСА објаснува дека оваа технологија овозможува снимање на површината на Земјата во висока резолуција, дење и ноќе, без оглед на временските услови.
Според соопштението од јануари за проширен договор помеѓу Iceye и Украина, сателитите на компанијата им пружаат поддршка на украинските вооружени сили, овозможувајќи постојан увид во реално време за состојбата на теренот. Останува нејасно дали ова се однесува на сателитот Iceye-X36, а компанијата одби да го коментира прашањето.
Индикациите дека руски воени сателити се обидуваат да им се приближат на сателитите со кои управува Iceye се појавија уште во мај. Во извештајот од јуни на британскиот тинк-тенк RUSI (Royal United Services Institute) се наведува дека, во тој период, четири руски сателити ги прилагодиле своите орбити за да се усогласат со траекторијата на сателитот Iceye-X36.
На 15 октомври, сателитот „Космос 2612“ се приближи до сателитот Iceye-X36. Според податоците од „ЛеоЛабс“, до раните утрински часови на 16 октомври, растојанието меѓу нив се намалило од 350 километри на помалку од пет километри.
Како што објави „ЛеоЛабс“ во понеделникот, по овој настан, „Космос 2612“ во текот на целиот викенд го одржувал растојанието – правејќи мали корекции на траекторијата за да остане во близина.
Си-Ен-Ен побара коментар од руското Министерство за одбрана, Воздушно-космичките сили и руската вселенска агенција „Роскосмос“.
Според „ЛеоЛабс“, до понеделникот, „Космос 2612“ почнал да се оддалечува од Iceye-X36. Компанијата сугерира дека маневрите на рускиот сателит можеби имале за цел инспекција, проучување, следење или потенцијално попречување на другиот сателит.
