Тираносаурус рекс, или ти-рекс, бил застрашувачки џин и се смета за едно од најопасните суштества што некогаш чекореле на оваа планета.
Сепак, имал една сличност со луѓето – анализата на хемиските траги зачувани во неговите заби покажала дека бил топлокрвен и дека имал телесна температура од околу 36 Целзиусови степени.
Ова се заклучоците од студијата објавена во научното списание „Science Advances“.
Истражувачите анализирале мали примероци од забната глеѓ на видот „Tyrannosaurus rex“ и врз основа на хемиските врски меѓу изотопите на јаглеродот и кислородот ја утврдиле температурата на која се формирала глеѓта, пренесе „Си-ен-ен“.
Бидејќи овие врски се формираат со различна брзина во зависност од температурата, научниците практично ги користеле забите како праисториски термометар.
Студијата претставува прва директна процена на телесната температура на ти-рексот и нуди дополнителни докази дека овој диносаурус имал активен метаболизам, кој му овозможувал да биде активен и во студени климатски услови.
Истражувачите користеле два мали примероци од забите на примерокот од тираносаурус познат како Томас, чиј околу 70 отсто зачуван скелет се чува во Природонаучниот музеј на округот Лос Анџелес. Методата се развивала повеќе од десет години, а количината фосилен материјал потребна за анализа е намалена за околу 90 отсто, на само неколку милиграми. Проценетата температура од околу 36 Целзиусови степени е повисока од вообичаената телесна температура на современите ладнокрвни влекачи, која изнесува околу 28 до 30 степени, но е пониска од температурата на многу современи птици.
Истражувачите наведуваат дека повисоката и регулирана телесна температура му овозможувала на ти-рексот подолго да издржува физички напор и да биде активен предатор.
Споредбата на температурата на ти-рексот со температурата на крокодилите и школките од истиот период и од истото подрачје дополнително потврдила дека неговата телесна температура била висока, изјавил палеонтологот Томас Холц помладиот, кој не учествувал во студијата.
Наодите, исто така, ја поддржуваат можноста дека тираносаурус рекс, чие име значи „крал на тиранските гуштери“, можел да живее во различни климатски услови. Врз основа на палеоклиматските модели, истражувачите заклучиле дека можел да населува голем дел од Северна Америка, од денешно Мексико до Алјаска. Високиот метаболизам значел и поголема потреба од храна во споредба со ладнокрвните влекачи.
Научниците планираат истиот метод да го применат и на други диносауруси и древни животни за дополнително да го истражат развојот на топлокрвноста низ еволуцијата.
Фото: Си-ен-ен, АП
