Тимот на 10 август го открил огромниот сад во доцноримска кула, односно помал утврден објект, во римската колонија Деултум. Не е познато во која битка загинало лицето, но се знае дека Деултум во текот на 4 и 5 век бил изложен на бројни напади од источногермански племиња и Хуни, изјавил за „Live Science“ раководителот на ископувањата Људмил Вагалински, археолог од Бугарската академија на науките.

Пронајдени и два железни ножа и појас

Остатоците од лицето биле пронајдени заедно со два железни ножа и појас, во сад познат како долиум.

Овие огромни садови биле најголемиот вид керамички садови во античкиот свет и се користеле од 8 век пред нашата ера до 5 век од нашата ера, главно за складирање намирници како маслиново масло и вино.

Најголемите долиуми можеле да соберат повеќе од 1.000 литри течност, иако зачуваниот долен дел од новооткриениот долиум бил нешто помал, со пречник од околу еден метар, објаснил Вагалински.

„Бевме изненадени“

Вагалински и неговите колеги ја истражувале кулата, поточно северната кула на западната порта на Деултум, но не очекувале дека на тоа место ќе пронајдат човечки останки, пренесува бугарскиот медиум „Standart News“, кој прв ја објавил веста за откритието.

„Бевме изненадени“, изјавил Вагалински.

Според него, многу ретко се случува археолозите да пронајдат човечки останки во античките градови, освен во случаи на „вонредни околности“, како земјотреси, непријателски напади или вулкански ерупции.

Дури и во такви ситуации, преживеаните главно се обидувале да ги пронајдат телата на загинатите и да ги погребаат надвор од градските ѕидини. Сепак, честопати не знаеле дека под урнатините сè уште се наоѓаат тела на настрадани луѓе. Новото откритие, смета Вагалински, најверојатно претставува токму една таква „вонредна околност“.

Траги од пожар, бронзени монети … 

Околу долиумот археолозите пронашле голем број траги од пожар, меѓу кои пепел и јаглен, искршени тули и покривни ќерамиди, разни фрагменти, поцрнети ѕидови, делови од стопено стакло, како и коски од домашни животни.

Пронајдени биле и бројни бронзени монети, кои најверојатно биле изгубени во хаосот што настанал за време на нападот.

Едно од можните сценарија е дека жителите, откако дознале дека се приближува непријателски напад, се обиделе да го внесат добитокот во утврдувањето за да го заштитат.

Лицето чии останки биле пронајдени, најверојатно млад маж, било дел од таа мешаница. Според Вагалински, можно е тој да влегол во огромниот сад обидувајќи се да се скрие од напаѓачите или да пронајде безбедно засолниште.