По рекордни 250 денови поминати на море без запирање на пристаништа, од кои голем дел биле поминати во борбени мисии на Блискиот Исток поради војната во Иран, американскиот носач на авиони на нуклеарен погон „УСС Абрахам Линколн“ конечно пристигна во Тајланд.
„Би-би-си“ наведува дека за речиси 5.000 членови на екипажот тоа значи почеток на повеќе од потребниот одмор.
Британскиот медиум нагласува дека американскиот воен брод пристигнал во близина на летувалиштето Патаја, познато по бурниот ноќен живот и секс-туризмот.
Се наведува дека за Америка престојот на „УСС Абрахам Линколн“ во Тајланд носи силни историски асоцијации.
Кога изморените морнари ќе влезат во градските барови и ресторани, буквално ќе чекорат по стапките на стотици илјади американски војници кои доаѓале тука на R&R (rest and relaxation – одмор и релаксација) за време на Виетнамската војна.
Токму тие американски војници го претвориле некогаш заспаното рибарско село Патаја во еден од најпознатите и најдинамичните градови за забава во светот.
Новинарот на „Би-би-си“ наведува дека денес уличките осветлени со неонски светилки, кои се спуштаат кон плажата, се многу потивки од вообичаено.
Баровите на познатата градска улица Вокинг стрит и понатаму на големи видео-бимови прикажуваат снимки од жени кои танцуваат околу шипки, обидувајќи се да ги привлечат посетителите да влезат внатре.
Меѓутоа, пред пристигнувањето на „УСС Абрахам Линколн“, кој располага со сериозен арсенал, британскиот новинар не забележал многу такви посетители. Повеќето туристи, како што рекол, биле семејства од Блискиот Исток кои изгледале позаинтересирани за турскиот продавач на сладолед отколку за го-го баровите.
Војната во Иран, која влијаеше врз туризмот и приходите од него во оваа област, тешко ги погоди локалните претприемачи.
Но, илјадниците американски морнари кои со себе носат девет месечни плати што немале каде да ги потрошат додека биле на море, претставуваат ретка можност за заработка.
Инаку американскиот носач на авиони го напуштил Сан Диего минатиот ноември, тргнувајќи на мисија која требало да трае шест месеци во Тихиот Океан и Јужното Кинеско Море.
Меѓутоа, бродот бил пренасочен кон Персискиот Залив, откако САД и Израел кон крајот на февруари започнаа воени операции против Иран.
Неодамна, некои членови на американскиот Конгрес изразија загриженост поради извештаите за недостиг на храна и расипани тоалети на воениот брод, како и за лошата психичка состојба на екипажот.
Американската морнарица призна дека условите за работа се тешки и наведе дека на екипажот му се обезбедува соодветна поддршка, но не сакала за „Би-би-си“ да го коментира пристигнувањето на носачот на авиони во Патаја, повикувајќи се на оперативната безбедност.
И покрај блиските односи со Кина, Тајланд има сојузнички договори со САД, па посетите на бродови на американската морнарица на пристаништата во земјата се вообичаена појава.
Сепак, ова веројатно е најголемиот број американски воени лица кои директно од воена зона пристигнале во Патаја од падот на Сајгон во 1975 година.
„Оваа посета би можела да биде нашата најголема надеж“, изјавил Анон Саитер, кој продава скапоцени камења во продавница во близина на Вокинг стрит.
Тој поставил голем знак со кој им посакува добредојде на американските морнари и маринци и им нуди специјален попуст.
„Немаме што да изгубиме, само се надеваме дека тука ќе потрошат малку пари“, рекол тој.
Американските и тајландските власти се обидуваат да обезбедат оваа посета да помине без скандалозни наслови во медиумите, по кои Патаја стана позната.
Тајландските власти соопштија дека постојат неколку места каде што на американските војници нема да им биде дозволено да одат.
Едно од нив е улицата Сои 6, која се спушта кон главната плажа и е позната по големиот број го-го барови.
Иако тајландската полиција ги потсети американските посетители дека проституцијата официјално е забранета во Тајланд, се проценува дека во градот всушност има меѓу 25.000 и 50.000 сексуални работнички.
Многу од нив работат во Сои 6, каде што стојат пред баровите и ги привлекуваат мажите да влезат внатре.
Многу продавници за канабис во Патаја исто така се забранети за членовите на американскиот екипаж, како и водените спортови, меѓу кои параглајдинг и возење џет-ски.
„Тоа е нивна одлука. Американската војска добро си ја завршила домашната задача“, изјавил градоначалникот Порамесе Нгампичес за „Би-би-си“.
Американската морнарица организирала шатл-автобуси од пристаништето до Патаја, кои сообраќаат секој ден од пет часот наутро до два часот по полноќ, сè додека носачот на авиони престојува во Тајланд.
Покрај тоа, обезбедени се и два хотела за оние членови на американскиот екипаж кои сакаат да се опуштат и да ја поминат ноќта на копно.
Тајландските власти распоредиле стотици полицајци за да ги надгледуваат зоните за забава во градот и ги предупредиле локалните бизниси да не им наплаќаат превисоки цени на американските гости.
„Посетите на американските војници пред 50-60 години ја претставија Патаја пред светот и ја претворија во туристичка атракција. Мора да бидеме искрени, градот има репутација на место познато по девојките од баровите. Ги разбираме стереотипите. Не можеме да го спречиме тоа. Она што можеме да го направиме е да покажеме дека Патаја се променила, дека сега имаме и други содржини, како спорт, семинари, велнес и активности за семејства. Тоа е мешавина од сè“, истакнал градоначалникот Порамесе.
Двете земји се надеваат дека до моментот кога „УСС Абрахам Линколн“ на 6 септември ќе тргне на долгото патување кон дома преку Тихиот Океан, екипажот ќе биде освежен и одморен.
