Британската организација за заштита на потрошувачите „Which?“ соопшти дека успеала да креира лажен оглас за Даунинг стрит 10 на платформата на туристичкиот гигант „Booking.com“.
Од организацијата наведуваат дека нивните истражувачи успеале дури и да резервираат лажен престој на адресата на британскиот премиер, како и да остават измислена рецензија во која како најдобар дел од посетата било наведено „дружењето“ со домашниот мачор Лари.
Организацијата тврди дека „Booking“ не го отстранил огласот дури два месеца откако бил поставен, и покрај очигледните показатели дека станува збор за измама.
„Овој ограничен тест не претставува верен одраз на искуството со милионите огласи и рецензии објавени на нашата платформа“, изјавил портпарол на „Booking.com“ за „BBC“.
Тој објаснил дека, бидејќи огласот што го поставила организацијата „Which?“ во текот на тие два месеца не бил јавно достапен на страницата, „некои автоматизирани контроли за откривање измами не биле активирани за целосно да го отстранат затворениот оглас“.
Корисниците можеле да го видат огласот и да испратат барање за резервација само во период од 20 минути, кој го отворила организацијата „Which?“, за нејзините истражувачи да можат да го тестираат системот за резервации.
Портпаролот на „Booking“ додал дека безбедноста на платформата е заштитена со „низа проверки и мерки за верификација“, како и дека технологии како вештачката интелигенција „помагаат да ги откриеме и отстраниме повеќето лажни огласи во рок од 24 часа“.
Меѓутоа, уредникот на рубриката за патувања во организацијата „Which?“, Рори Боланд, изјавил дека тестирањето покажало оти тие проверки се „несоодветни“.
„Ако наводно софистицираните системи за вештачка интелигенција на ’Booking‘ не можат да препознаат дека Даунинг стрит 10 не е сместување за одмор, тогаш не е ни чудо што измамниците толку лесно ја злоупотребуваат платформата“, изјавил тој.
„Би било смешно тоа што успеавме да ја понудиме за изнајмување најпознатата адреса во Велика Британија, доколку последиците не беа толку погубни за туристите, кои ризикуваат да изгубат илјадници фунти поради лажни огласи и фишинг-линкови“, заклучил Боланд.
Ова не е првпат платформата да се соочува со критики поради своите безбедносни мерки.
Службата за борба против високотехнолошки криминал при Управата за техника на Министерството за внатрешни работи на Србија во април ги предупреди граѓаните за зголемен ризик од злоупотреби и измами на „Booking.com“.
Тогаш, според соопштението на МВР, неовластени лица добиле пристап до податоци како имиња, контакт-информации и детали за резервации, кои можат да бидат злоупотребени за насочени измами и фишинг-напади.
Денес
