Овој модел воедно е и првиот член на новото семејство електрични кампери на „Volkswagen“, кое до 2028 година би требало да се прошири со нови возила. Во центарот на концептот е практичноста, па така „ID. California Cruise“ нуди кревет за две лица, посебен режим „California“ за време на кампување, приклучоци за напојување надворешна опрема и интеграција со апликација за планирање на застанувањата на полначи. Целта е да се поедностави организацијата на патувањето без компромиси во поглед на удобноста или досегот на возилото.

Структура на понудата и планови за проширување

„ID. California Cruise“ е базиран на моделот „ID. Buzz Pro“ и ја користи неговата електрична платформа. Купувачите ќе можат да избираат меѓу верзија со пократко и подолго меѓуоскино растојание, во зависност од нивните потреби за простор. „Volkswagen“ на оваа основа додава пакети со опрема како „Interior Style“ и „Comfort“, како и адаптер „PowerSocket“ за напојување надворешни уреди.

Овој модел го означува почетокот на семејството „ID. California“, кое до 2028 година ќе биде проширено со нови електрични варијанти. Со тоа, успешната формула по која името „California“ е познато уште од 1988 година се пренесува во електричната ера: компактни кампери практични за секојдневно возење, но секогаш подготвени за патување.

Внатрешност и опрема за кампување

Внатрешноста е приспособена за кампување и вклучува интегриран кревет за две лица со димензии од 200 × 120 сантиметри. За удобноста при ноќевање се грижат посебен систем за потпора и преклоплив душек со дебелина од девет сантиметри.

Во стандардната опрема се вклучени и препознатливите детали на моделите „California“, како вентилациски решетки за предните прозорци, заштити од сонце за сите стакла, како и две преклопливи столици и маса кои се сместуваат во сопствени прегради. Верзиите со панорамски стаклен покрив добиваат и соодветна заштита од сонце.

Надворешниот изглед го карактеризираат декоративните елементи „Miwo“ со натпис „California“, графиките „Cruise“ на страничните делови од возилото, како и посебните ознаки на моделот на вратата од багажникот.

Посебен режим и управување со енергијата

Една од клучните новини е режимот „California“, осмислен за користење додека возилото е паркирано. Посебна контролна единица тогаш ја презема контролата врз осветлувањето и функциите за удобност, обезбедува напојување на „USB“ приклучоците и ја подготвува кабината за ноќевање. Системот вклучува и независна климатизација за одржување на посакуваната температура.

Од „Volkswagen“ наведуваат дека климатизацијата може да ја загрева или лади внатрешноста до 48 часа без прекин. Времетраењето зависи од нивото на наполнетост на батеријата и температурната разлика. На тој начин се овозможуваат подолги застанувања со целосна удобност, без потреба возилото да биде поврзано со надворешен извор на електрична енергија.

Апликација, полнење и двонасочен проток на енергија

Апликацијата „California“ е надградена со функции наменети за електрични возила. При планирањето на патувањето, таа сега ги прикажува компатибилните полначи долж избраната маршрута.

Камперот ја поддржува и функцијата „Plug & Charge“, која преку апликацијата на „Volkswagen“ го поедноставува процесот на полнење. На компатибилните станици, полнењето започнува автоматски веднаш штом ќе се приклучи кабелот, без потреба од дополнителна авторизација.

Благодарение на технологијата „vehicle-to-load“, „ID. California Cruise“ може да служи и како извор на електрична енергија и од сопствената батерија да напојува надворешни уреди, како апарати за кафе, преносни фрижидери, осветлување или полначи за електрични велосипеди.

Нема сомнение дека оваа модерно-ретро приказна со својот изглед ќе освои многумина, а останува да се надеваме дека интересниот концепт ќе биде проследен и со голем број испораки.