„Стресот и храната се тесно поврзани“, вели магистерката по нутриционизам Габриел Кишнер. Таа објаснува дека во периоди на стрес се зголемува желбата за слатка храна или јаглехидрати, бидејќи таквата храна обезбедува брза енергија и го поттикнува ослободувањето допамин, невротрансмитер кој во мозокот создава чувство на задоволство.

Некои од овие намирници кои имаат лоша репутација, всушност се хранливи и можат да му помогнат на организмот во справувањето со стресот. Исхраната, секако, не е единствената стратегија за опуштање, но следниот пат кога поради стрес ќе почувствувате потреба за храна, размислете за некоја од овие опции.

Ореви и темно чоколадо

Посегнете по ореви прелиени со темно чоколадо или едноставно измешајте една рака ореви со парчиња чоколадо. Иако и двете намирници се познати по високата содржина на масти, нивната комбинација може да биде многу ефикасна во борбата против стресот. „Оревите содржат омега-3 масни киселини и антиоксиданси кои го поддржуваат здравјето на мозокот и доброто расположение“, наведува Кишнер. И темното чоколадо може да има смирувачки ефект врз нервниот систем.

Тестенини

За многумина тестенините се синоним за премногу јаглехидрати, но нивното влијание врз расположението може да биде значајно. Едно истражување ги проценувало емоциите поврзани со консумирањето тестенини и го потврдило она што многумина веќе го знаат: тестенините ги прават луѓето посреќни.

Сепак, истражувањето отишло и чекор понатаму и покажало дека тестенините поттикнуваат позитивни чувства бидејќи луѓето ги поврзуваат со емоции, културен идентитет и чувство на благосостојба. Кишнер напоменува дека за здрав одговор на организмот е важен балансиран оброк. Таа препорачува тестенини од цели зрна, со многу растителни влакна од зеленчук и немасни протеини, како пилешкото месо.

Кафе

Иако кафето долго време имаше лоша репутација, тоа всушност е богато со антиоксиданси кои се поврзуваат со помал ризик од одредени заболувања. „Шолја кафе не дава само енергија. Поновите истражувања покажуваат дека умереното консумирање кофеин помага во справувањето со стресот и штити од нарушувања на расположението“, вели нутриционистката Лиса Московиц.

Редовното, но умерено пиење кафе се поврзува и со подобро справување со стресот и со помал интензитет на реакциите на стресни ситуации. Со други зборови, луѓето кои пијат кафе во умерени количини би можеле да бидат поотпорни на стрес.

Сепак, ако по кафето чувствувате нервоза или анксиозност, тоа веројатно не е добар избор за вас. Покрај тоа, важна е и количината. Големите дози кофеин можат да предизвикаат несакани ефекти. „Клучот е да не претерувате и да не пиете кафе предоцна, бидејќи тоа може да го наруши сонот и менталното здравје“, додава Московиц.

Чипс и гвакамоле

Понекогаш едноставно ви е потребно нешто солено и крцкаво за грицкање. „Размислете што друго можете да додадете во вашата ужина или оброк за да ја зголемите неговата нутритивна вредност“, советува Кишнер.

Во овој случај, доколку имате желба за солен чипс, таа препорачува да го јадете со гвакамоле, кое е богато со здрави незаситени масти. „Ако комбинирате различни групи хранливи материи, побрзо ќе се заситите и на тој начин ќе спречите прејадување“, вели таа.

Црвено месо

„Црвеното месо често има лоша репутација, но тоа всушност е главен извор на витамини од групата Б кои обезбедуваат енергија, како и на железо, цинк и протеини. Овие хранливи материи помагаат во заштитата од оксидативен стрес и во стабилизирањето на шеќерот во крвта“, вели Московиц. При изборот на црвено месо, клучно е да се избираат посни парчиња кои содржат помалку заситени масти.

Житарки

„Освен што помагаат во одржувањето на рамнотежата на шеќерот во крвта, јаглехидратите од интегралните житарки можат да го поттикнат лачењето на серотонин, кој природно го намалува зголеменото ниво на кортизол, хормонот на стресот“, објаснува таа.

Покрај тоа, млекото со ниска содржина на масти исто така се поврзува со подобро расположение и помала анксиозност. Причината веројатно лежи во тоа што млечните протеини и хранливите материи како казеинот и калциумот позитивно влијаат врз невротрансмитерите кои го регулираат расположението.

Пуканки

Ако сте расположени за нешто крцкаво, пуканките се одличен избор. „Пуканките всушност се интегрална житарка“, вели нутриционистката Ава Ајлуни. Истражувањата сугерираат дека луѓето кои се под стрес поради недостиг на време почесто избираат едноставни грицки. Пуканките се идеален избор бидејќи брзо се подготвуваат.

Разликата меѓу хранливите и помалку здравите пуканки е во начинот на подготовка и додатоците. „Пуканките подготвени со топол воздух и со малку маслиново масло можат да бидат многу хранлива опција“, вели Ајлуни.