Романската влада одлучи да стави крај на хроничното игнорирање на сообраќајните казни. Од 25 август важи правило според кое секој што нема да ја плати казната навреме ќе ја изгуби возачката дозвола онолку денови колку што одговараат на висината на долгот.
Романскиот начин за решавање на неплатените сообраќајни казни е прилично едноставен.
Наместо бескрајни постапки за присилна наплата и документација, се воведува едноставна формула: за секои 50 леи (околу 10 евра) неплатена казна следува забрана за управување со возило во траење од еден ден. Така, поголем неплатен износ може да значи дека возачот ќе биде без автомобил неколку недели или дури и подолго.
Долгот, сепак, не исчезнува. Откако возачот ќе го „одработи“ пресметаниот број денови без возење, возачката дозвола ќе му биде вратена, но финансиската обврска кон општината или државата останува во целост, вклучително и каматите. Единствениот излез е едноставно – да се плати долгот.
Кај поголемите казни ќе помогне дури и делумна уплата. На пример, ако возачот добие казна од околу 350 евра и успее да плати 150 евра, преостанатиот долг од околу 200 евра значи дека ќе остане 20 дена без право да управува со автомобил.
Прекршителите нема да бидат казнети веднаш. Од моментот на доставување на казната имаат 90 дена за плаќање.
Најниската можна казна во Романија, дури и за помали прекршоци како мало пречекорување на брзината или неносење сигурносен појас, изнесува 432,5 леи (околу 80 евра). Ако казната се плати во рок од 15 дена, државата простува половина од износот.
Меѓутоа, ако возачот три месеци го игнорира плаќањето, целосниот износ на казната ќе значи дека осум дена нема да смее да управува со автомобил.
Целиот систем се темели на поврзување на локалните даночни управи со националниот регистар на возачки дозволи преку државниот информатички систем PatrimVen. Даночната управа најпрво му испраќа известување на должникот со точниот датум и пресметката. Доколку парите не бидат уплатени, забраната за управување со возило автоматски започнува на полноќ на третиот работен ден по истекот на рокот од 90 дена.
Добрата вест за возачите е што системот функционира и во спротивна насока. Кога должникот целосно ќе го плати долгот, службениците се должни да ја внесат промената во системот во рок од два работни дена, по што возачката дозвола веднаш му се враќа.
Овој строг закон во Романија стапи на сила на 25 август, но во пракса настанал бизарен правен застој.
Иако владата започнала со примена на прописот, Апелацискиот суд во Букурешт во последен момент го суспендирал правилникот.
Така настанал парадокс: законот е на сила и новите правила се однесуваат на сите казни изречени од 25 август, но полицијата моментално нема функционална методологија ниту меѓусебно поврзани системи што би овозможиле реално одземање на возачките дозволи.
Владата веднаш поднела жалба против одлуката на судот до Врховниот касациски суд. Ако судовите ја решат оваа правна „збрка“, роковите ќе се пресметуваат ретроактивно од денот кога самиот закон стапил на сила.
