Кинеските производители на хуманоидни роботи во последните две години ги привлекуваа инвеститорите со атрактивни демонстрации, од брејкденс до боречки вештини, но на конференцијата во Пекинг оваа недела ќе мора да покажат дали нивните роботи можат сигурно да создаваат економска вредност. На Светската конференција за роботи, која од среда до недела се одржува во Пекинг, се очекуваат повеќе од 300 компании со над 2.000 експонати и повеќе од 150 нови производи, според податоците на градските власти во Пекинг.

Конференцијата се одржува во пресрет на излегувањето на берза на кинеската компанија „Unitree“, еден од водечките светски производители на хуманоидни роботи. Нејзиниот основач Ванг Сингсинг во четврток ќе зборува за развојот на индустријата за хуманоидни роботи во следната деценија.

Фокусот се префрла на реалната примена

Додека интересот на инвеститорите за кинеските хуманоидни роботи достигнува нови нивоа, фокусот сè повеќе се префрла од атрактивните демонстрации кон нивната реална примена. Инвеститорите и купувачите сè почесто ги оценуваат роботите според тоа колку продуктивно работат, колкав човечки надзор им е потребен и дали можат да ги оправдаат трошоците.

Иако роботите во Кина веќе ги заменуваат луѓето на одредени работни места, како што се доставувањето храна во хотели и работата на одредени производствени линии, нивната поширока примена во различни индустрии сè уште не заживеала. Некои сметаат дека времето за таква проверка одамна пристигнало.

„Lumos Robotics“, стартап кој на конференцијата го претставува својот робот „MOS“ со поддршка од „Mitsubishi Electric“, го развива за примена во индустријата, на пример за проверка на опрема и ракување со материјали, а не за домашна употреба или забава. Извршниот директор Ју Чао за „Reuters“ изјави дека најмногу ризикуваат компаниите што ги развиваат самите роботи, моделите или податоците, а притоа не ја докажуваат нивната примена во реалниот свет.

„На крајот, сè ќе се сведе на едноставно прашање: може ли роботот да создаде вредност за купувачот?“, изјави Ју, додавајќи дека компаниите што нема да можат да го направат тоа ќе испаднат од играта.

Роботите сè уште се прескапи

Експертот за роботика Георг Штилер проценува дека меѓу 50 и 70 проценти од хуманоидните роботи произведени оваа година би можеле да завршат во фабрики за податоци, каде што би се користеле за собирање податоци за тренирање, наместо за извршување задачи за клиентите.

Според проценката на кинеската брокерска куќа „Guotai Securities“, индустриски хуманоиден робот би требало да чини околу 20.500 евра, вклучувајќи го и одржувањето, за во рок од две години да стане поисплатлив од работник чија годишна плата изнесува околу 10.250 евра. Реалните цени на ваквите роботи, меѓутоа, се движат меѓу околу 39.000 и 65.000 евра, според берлинскиот институт „MERICS“.

Роботите ќе мора да покажат што навистина можат

Дополнителен тест следува од сабота на Светските игри на хуманоидни роботи во Пекинг, каде што, покрај трките, фудбалот и борбите, роботите ќе се натпреваруваат и во извршување задачи од реалното работно опкружување. Роботите, меѓу другото, ќе пакуваат и складираат стока, ќе извршуваат задачи во индустриското производство, ќе полнат електрични возила, како и ќе поврзуваат кабли и ќе користат алати.

За разлика од трка или танцувачка точка, ваквите задачи проверуваат дали роботите можат да препознаваат непознати предмети, да повторуваат задачи, да ги коригираат грешките и да ја завршат работата без помош од инженери. Претворањето на атрактивните демонстрации во економски исплатливи производи не е проблем само на кинеската индустрија.

Во САД компаниите исто така се соочуваат со недостиг од стручни оператори, како и со високи трошоци за транспорт, инсталирање и одржување на роботите. Геополитиката дополнително ја отежнува ситуацијата. Американската Федерална комисија за комуникации во јули го ограничи одобрувањето нова опрема за напредни роботски уреди произведени во странство, што погоди и некои кинески производители, меѓу кои и „Unitree“.

Според проценката на истражувачката компанија „IDC“, Кина е заслужна за 82 проценти од светските испораки на хуманоидни роботи.