Меѓутоа, кога мистериозната „Покемон принцеза“ на почетокот од годината првпат се појави во јавноста, многумина не поверуваа дека нејзината приказна е вистинита. Некои колекционери тврдеа дека таа е само манекенка ангажирана за маркетиншка кампања, додека други беа уверени дека нејзиниот лик е создаден со помош на вештачка интелигенција.

Затоа Жолина одлучи работите да ги преземе во свои раце.

Докажувала дека постои

Таа покрена официјална интернет-страница, почна да објавува снимки и се согласи да зборува за медиумите за да докаже дека навистина постои и дека зад гламурозните фотографии се крие вистинска колекција.

Сепак, мистеријата не исчезна целосно. Пред оваа година речиси и да немало траги за неа на интернет, па сè уште не е потврдено ниту дали Жолина Жизел е нејзиното вистинско име или внимателно одбран псевдоним.

За магазинот „Tatler“ позирала во кожен мантил, со куфер со картички пред хеликоптер, објаснувајќи зошто претставувањето на колекцијата било осмислено како сцена од шпионски филм.

„Навистина сакавме да ја откриеме колекцијата на мистериозен начин. Сакавме да биде гламурозно бидејќи сметаме дека таа го заслужува тоа“, рекла таа.

Сè започнало поради татко ѝ

Жолина почнала да собира Покемон картички на седумгодишна возраст, по поттик од нејзиниот татко Урс, технолошки претприемач кој одлучил семејните пари да ги вложува во ретки колекционерски примероци наместо во јахти, дијаманти и други симболи на луксузот.

„Секој швајцарски франк што не нѝ бил потребен одеше во Покемон“, открил нејзиниот татко.

Она што започнало како заедничко хоби, со текот на времето прераснало во потрага по најретките и најдобро зачуваните картички во светот. Според податоците од официјалната страница на колекцијата, повеќе од 12.000 примероци се професионално оценети, а голем број добиле највисока оценка PSA 10.

Меѓу вредните предмети се наведуваат ретки промотивни и трофејни картички, како и исклучително бараните примероци со ликот на Пикачу.

Картичките ѝ донеле друштво

Жолина тврди дека колекционерството за неа не било само необичниот начин на кој нејзиниот татко одлучил да ги вложува парите. Како многу срамежливо дете, со помош на картичките се обидувала да им се приближи на врсниците и да најде пријатели.

„Ми се допаѓаше тоа што се собираа деца од сите возрасти и разменуваа картички. Кул, постарите деца и јас во прво одделение“, раскажала таа.

Сепак, семејството наводно со години не било целосно свесно колкава вредност се крие во нивниот дом. Дури во октомври минатата година, кога картичките биле преместени во строго обезбеден трезор на тајна локација во Швајцарија, станало јасно дека повеќе не станува збор за обично хоби.

Колекцијата официјално била претставена во април, во краток промотивен филм снимен во стилот на Џејмс Бонд.

Рекордот сè уште не е нејзин

Иако Жолина својата збирка ја претставува како најголема и највредна во светот, тоа тврдење сè уште нема потврда од Гинисовата книга на рекорди.

Официјалниот рекорд и натаму им припаѓа на британските браќа Овен и Конер Греј од Есекс. Нивната колекција има 48.339 верификувани Покемон картички, а рекордот е потврден на 11 јули 2024 година. На проверка предале повеќе од 50.000 примероци, но професионалните оценувачи во конечниот резултат ги вклучиле само потврдените картички.

Доколку сите 60.000 картички на Жолина бидат попишани и верификувани според правилата на Гинис, таа би можела да ги надмине британските браќа. Засега, сепак, нејзината колекција останува една од најмистериозните и потенцијално највредните приватни збирки од овој вид.