Во текот на летните горештини организмот многу побрзо губи течности, а дехидратацијата често се развива незабележливо. Многумина веруваат дека жедта е првиот знак дека на телото му недостига вода, но организмот и пред тоа испраќа предупредувања кои лесно можат да се помешаат со замор или исцрпеност.
Навременото препознавање на овие знаци може да ви помогне да избегнете посериозни здравствени тегоби. Еден од најлесните начини да проверите дали сте доволно хидрирани е бојата на урината. Светложолтата боја најчесто укажува на доволен внес на течности, додека потемната урина и поизразениот мирис можат да бидат знак дека на организмот му недостига вода, дури и ако не чувствувате жед.
Недоволниот внес на течности често најпрво се одразува врз работата на мозокот. Тогаш може да се појават послаба концентрација, забавено размислување и чувство на таканаречена „мозочна магла“. Ако во текот на денот забележите дека сте безволни и тешко се концентрирате, можно е да ви е потребна чаша вода, а не уште едно кафе.
Главоболката исто така е еден од честите знаци на дехидратација. Кога телото губи повеќе течности отколку што внесува, доаѓа до промени во рамнотежата на течностите, што може да предизвика болка. Во потешки случаи може да се јават вртоглавица, пад на крвниот притисок, слабост, па дури и губење на свеста.
Недостатокот на вода може да влијае и врз расположението. Раздразливоста, напнатоста и чувството на нервоза понекогаш не се последица на стрес или замор, туку едноставно знак дека на организмот му недостигаат течности.
Дехидратацијата најчесто настанува кога телото губи повеќе течности отколку што внесува. Високите температури, засиленото потење, долгото изложување на сонце, покачената телесна температура, консумирањето алкохол и интензивната физичка активност дополнително го зголемуваат ризикот од губење вода.
На повеќето возрасни лица им се потребни меѓу 1,5 и 2 литри течности дневно, а во денови со исклучително високи температури и повеќе. Наместо да чекате да почувствувате жед, подобро е водата да ја пиете во помали количини во текот на целиот ден. Светлата боја на урината и понатаму е еден од наједноставните показатели дека организмот добива доволно течности.
