Многу возачи го прават истото речиси несвесно – штом почнат да паркираат, ја намалуваат музиката или целосно го исклучуваат радиото. Иако на прв поглед изгледа како обична навика, психолозите тврдат дека зад ова однесување стои начинот на кој функционира човечкиот мозок.
Експертите објаснуваат дека во такви моменти мозокот се обидува да отстрани сè што му го одвлекува вниманието за да може целосно да се фокусира на задачата што бара најголема концентрација.
Мозокот не може подеднакво да се фокусира на повеќе сложени задачи
Иако човечкиот мозок истовремено обработува информации што доаѓаат преку видот, слухот, допирот, мирисот и вкусот, научниците истакнуваат дека не може подеднакво ефикасно да се фокусира на повеќе сложени активности во исто време.
Кога возачот ќе се најде во ситуација што бара зголемено внимание, како што се паркирање наназад, возење по силен дожд или движење низ густ градски сообраќај, мозокот автоматски и дава предност на најважната задача.
Поради тоа, многу луѓе инстинктивно ја намалуваат музиката или го прекинуваат разговорот во автомобилот.
Зошто помага намалувањето на музиката?
Со намалување на бучавата во кабината, мозокот полесно ги проценува пречките, растојанието до другите возила и просторот потребен за безбедно паркирање.
Психолозите наведуваат дека тоа е природен одбранбен механизам кој овозможува повеќе ментални ресурси да се насочат кон возењето, наместо кон обработката на дополнителните звуци од околината.
Со други зборови, намалувањето на радиото не ги подобрува слухот или видот, туку ослободува дел од вниманието што инаку би било насочено кон музиката или разговорот.
Несвесна навика што ја имаат голем број возачи
Ваквото однесување најчесто се јавува при паркирање, барање адреса во непознат дел од градот, возење низ тесни улици или во други ситуации кога е потребно брзо да се процени просторот и да се донесе одлука.
Експертите истакнуваат дека станува збор за сосема нормална реакција на мозокот, која му помага на возачот полесно да се справи со посложените задачи и да ја намали можноста за грешка.
Затоа, следниот пат кога автоматски ќе посегнете по копчето за намалување на радиото додека паркирате, знајте дека тоа не е случајност – вашиот мозок едноставно се обидува да ви помогне што подобро да се концентрирате на она што во тој момент е најважно.
