Наследство вткаено во дизајнот

За разлика од претходните модели од програмата „Solitaire“, „Brouillarda“ и „F.K.P. Hommage“, кои носеа емотивни приказни, „Destrier“ е инстинктивно дизајнерско дело кое сепак ја задржува врската со историјата на брендот. Изграден е на истата шасија како „Bolide“, слично како што легендарниот „Type 57“ некогаш бил основа и за победничките тркачки автомобили и за култниот модел „Atlantic“. Почитта кон тоа наследство е изгравирана со ласер над ветробранското стакло.

Нов дизајнерски јазик

Препознатливата „C“ линија на „Bugatti“ овде „дише“, откривајќи ја чистата површина на каросеријата пред да продолжи кон потковичестата маска на ладилникот, која е поширока отколку кај „Bolide“ и зрачи со воздржаност наместо со агресивност. Задниот спојлер потсетува на „Chiron Profilée“, додека силуетата ја обележуваат тесниот струк и нагласените крила – форма што ретко се гледа надвор од првичните дизајнерски скици.

Автомобилот е изработен во ексклузивната боја „Sapphire Celeste“, со дијамантски сјај што ја нагласува неговата скулптурална форма, а бојата има и историска симболика: легендарната шасија „Type 57SC Atlantic“ првично била сина. Деталите во моторниот простор имаат текстура што потсетува на рачно кован метал, како суптилна почит кон витешкиот оклоп.

Ентериер како кројачко ателје

Внатрешноста се оддалечува од спортскиот кокпит на „Bolide“ и се приближува до топлината на врвно кројачко ателје. Комбинацијата од кожа и нубук во нијансата „Ambre Voyageur“, заедно со напредниот 3Д-плетен текстил со бакарни нишки, создава кружен „halo“ мотив околу кабината. Истата текстура на кован метал се појавува на рачките на вратите, отворите за воздух, воланот и праговите, додека малото француско знаме потсетува на потеклото на брендот.

Под каросеријата се крие комплетниот погонски систем на „Bolide“, вклучувајќи го и „W16“ моторот со 1.600 коњски сили, но перформансите во овој проект се само спореден детал. Главниот акцент е ставен на пропорциите и врвната изработка.

Зборовите на директорот за дизајн

„Destrier“ не е автомобил што го разбирате со разумот, туку автомобил што го чувствувате со срцето. „Bolide“ ни ги даде најекстремните пропорции што некогаш сме ги создале, а кога ги ослободивме од потрагата по аеродинамичен потисок, им дозволивме да проговорат како скулптура“, изјави Франк Хејл, директор за дизајн на „Bugatti“, додавајќи дека верува оти „Destrier“ и по 50 години ќе ги краси тревниците на престижните настани „Concours d’Elegance“.

„Bugatti Destrier“ ќе биде претставен пред јавноста за време на „Monterey Car Week“, чиј врв е настанот „Pebble Beach Concours d’Elegance“, на 16 август 2026 година.