Причините можат да бидат различни – од истегнувања и исчашувања до хронични заболувања како што е остеоартритисот, најчестата форма на артритис. Хирургот Сајед Надим Абас вели дека кај лицата постари од 40 години болката во коленото најчесто е поврзана со трошење на зглобовите.

„Тоа и понатаму е најверојатното објаснување“, истакнал тој, но предупредил дека постои еден вид болка што никако не треба да се игнорира.

Кога ноќната болка бара лекарски преглед?

Експертот предупредил дека посебно внимание треба да се обрне на болката што не се однесува како вообичаена болка во зглобовите.

„Станува збор за болка што е посилна во мирување отколку за време на активност или за болка што ве буди среде ноќ, наместо да се смирува“, објаснил д-р Абас.

Според него, таквата болка не треба автоматски да се припишува на стареењето или истрошеноста на зглобовите, туку е важно навреме да се провери. Од друга страна, болката предизвикана од остеоартритис или преоптоварување најчесто се намалува при одмор.

Иако станува збор за многу ретки случаи, болката што се влошува во текот на ноќта може да биде и еден од знаците на рак на коските. Британската Национална здравствена служба (НХС) меѓу можните симптоми на рак на коските ја наведува токму болката или чувствителноста во коската што е поизразена во текот на ноќта.

Д-р Абас додал дека хондросаркомот, најчестиот облик на примарен рак на коските, најчесто ги погодува лицата постари од 40 години. Ваквите симптоми не се јавуваат само во коленото, туку и во карлицата, градниот кош, рацете, лопатките и другите делови на нозете, пишува „Huffington Post“.

Што уште може да предизвика ноќна болка?

Важно е да се нагласи дека примарниот рак на коските е исклучително редок. Во Обединетото Кралство секоја година се дијагностицира кај околу 550 лица.

Ноќната болка во коленото може да биде предизвикана и од многу други состојби, меѓу кои се ревматоиден артритис, гихт, воспаление на тетивите (тендинитис), препателарен бурзитис, Осгуд-Шлатерова болест, како и различни повреди, наведуваат експертите од клиниката „Кливленд“.

Д-р Абас истакнал дека зад неочекуваната болка во коленото понекогаш може да се крие и недостаток на витамин Д.

Со тоа се согласил и ортопедскиот хирург д-р Ким Стернс, кој рекол:

„Здравите колена обично не болат ноќе. Ако сепак се појави болка, најчесто постои причина за тоа, а можните причини можат да бидат повеќе“.

Доколку ве загрижува болката во коленото, особено ако се јавува во текот на ноќта или трае подолг период, најдобро е да се обратите кај вашиот матичен лекар.