Семките од лубеница често завршуваат во канта за отпадоци, иако по сушењето и печењето можат да се јадат исто како семките од сончоглед или тиква.

Во споредба со нив, семките од лубеница се уште похранливи. Освен што се богат извор на магнезиум, железо, цинк и незаситени масни киселини, тие содржат и значителна количина протеини.

Сто грама сушени семки од лубеница содржат околу 28 грама протеини, а според некои извори и повеќе. Токму поради тоа, во последно време сè почесто се споменуваат како еден од најдобрите природни извори на протеини. Некои дури наведуваат дека по грам содржат повеќе протеини од говедското месо, пишува „Slobodna Dalmacija“.

Ако одлучите да ги збогатите оброците со семки од лубеница, не е доволно само да ги голтнете додека уживате во ова сочно овошје. Потребно е добро да ги изџвакате или претходно да ги исушите и испечете во тава, исто како што се подготвуваат семките од тиква, кои веќе долго време се сметаат за супернамирница.

Најдобро е да се користат зрели семки, црни или темнокафеави, зависно од сортата на лубеницата.

Ставете ги семките во цедалка, добро исплакнете ги и со прстите отстранете ги остатоците од месото на лубеницата. Потоа распоредете ги на чиста кујнска крпа, исушете ги со лесно тапкање и наредете ги во еден слој на послужавник. Оставете ги да се сушат на топло и проветрено место. Пред складирање мора да бидат целосно суви, бидејќи влажните семки лесно можат да мувлосаат.

Исушените семки можете да ги испечете во тава. Прелијте ги со вода колку да бидат покриени, додадете малку сол и загревајте додека водата не испари. Потоа продолжете со печење во сува тава, со често мешање, сè додека не станат крцкави и не добијат блага арома на јаткасти плодови.

Можете да ги подготвите и во рерна – распоредете ги во еден слој на плех и печете ги на умерена температура додека не добијат златно-кафеава боја и крцкава текстура.

Семките од лубеница се богати со протеини

Вака подготвените семки можете да ги грицкате како семки од сончоглед, но постојат и други начини да ги вклучите во исхраната.

Мелените семки можете да ги додавате во јогурт, овесни снегулки, леб, салати или песто. Имаат благ, јаткаст вкус, а една до две лажици се доволни за да го збогатат оброкот со протеини, здрави масти и минерали.

Иако семките од лубеница се исклучително хранливи, се препорачува умерено консумирање и одредена внимателност при нивната употреба.