Иако протеините имаат важна улога во контролата на шеќерот во крвта, зачувувањето на мускулната маса и чувството на ситост, експертите предупредуваат дека прекумерниот внес може да ја наруши рамнотежата на исхраната и да предизвика повеќе непријатни симптоми.
Протеините во последните години станаа еден од најистакнатите нутритивни трендови, па денес се додаваат во бројни производи, од чипс и пуканки до житарки и протеински плочки.
Нутриционистката Мекензи Бурџес предупредува дека пристапот според кој повеќе секогаш е подобро не е нужно и најздрав, додека диететичарката Талија Фоладор наведува дека поради фокусирањето на протеините често се намалува внесот на храна богата со растителни влакна, витамини, минерали и јаглехидрати, кои му се потребни на организмот за енергија.
Експертите наведуваат дека прекумерниот внес на протеини може да доведе до запек, особено ако исхраната богата со протеини ги потиснува овошјето, зеленчукот, мешунките и интегралните житарки. Како решение се препорачува поголем внес на растителни извори на протеини, како што се гравот, леќата, јаткастите плодови, семките и интегралните житарки, бидејќи покрај протеините содржат и растителни влакна, важни за варењето.
Еден од можните знаци е и почестото мокрење. Диететичарката Џоана Кац објаснува: „Многу високиот внес на протеини ја зголемува количината на уреа и друг азотен отпад што бубрезите мора да го исфрлат, што може да ја зголеми количината на урина и потребата од течности“.
Поради тоа се зголемува и ризикот од дехидратација, со симптоми како што се засилена жед, замор, вртоглавица и конфузија.
Ако протеините ги заменат јаглехидратите, може да се појават замор, послаби резултати при тренинг и посилна желба за благо. Сара Анзловар наведува дека јаглехидратите се главниот извор на енергија, додека Фоладор додава: „Иако протеините се важни за изградба и закрепнување на мускулите, јаглехидратите се она што ги придвижува вашите тренинзи и овозможува протеините да се искористат за закрепнување на мускулите“.
Претерувањето може да доведе и до зголемување на телесната тежина, особено кога протеинските плочки, шејковите и збогатените производи се додаваат во постојната исхрана наместо да заменат некоја друга храна.
Според новите американски препораки за исхрана, општата препорака за здрави возрасни лица е внес од 1,2 до 1,6 грама протеини по килограм телесна маса дневно, а точната потреба зависи од возраста, нивото на физичка активност и здравствената состојба.
