Ова го соопшти една од водечките светски аукциски куќи специјализирани за предмети од прекуокеански бродови, „Хенри Олдриџ и синот“ од Девизез, Вилтшир.

Купил билет со број 250643

Писмото било напишано од Хенри Прајс Хоџис на 10 април 1912 година, само неколку дена пред да загине во трагедијата на Титаник.

Хоџис го испратил писмото до својот пријател Хектор Јанг од Конзервативното здружение во Њутаун, Саутемптон. Со поштенски жиг од Квинстаун, во писмото го опишал убавото време и пријатната атмосфера на бродот.

Хоџис, патник од втора класа, се качил на Титаник во Саутемптон со билет број 250643, кој чинел 13 фунти, а патувал за Бостон за да ги посети своите роднини.

Во писмото до својот пријател напишал дека „воопшто не се чувствува движењето на бродот“, но и дека „времето е навистина прекрасно“.

Погребан во Нова Шкотска

„На горната палуба има околу 200 млади луѓе (на возраст од 20 години па нагоре) кои маршираат и пеат, други играат домино и карти во салоните, некои читаат, некои пишуваат. Сè е сосема поинакво од она што би очекувале да го видите на море“, се наведува, меѓу другото, во писмото на патникот од Титаник.

Хоџис загинал откако бродот, кој удрил во санта мраз, потонал на 15 април 1912 година, во трагедија што однела околу 1.500 животи. Неговото тело подоцна било пронајдено и погребано на гробиштата Фервју во Халифакс, во Нова Шкотска, Канада.

Аукционерот Ендру Олдриџ изјавил дека писмата напишани од патници од втора класа се меѓу најретките.

„Ова писмо ни овозможува историски непроценлив увид во тоа каков бил животот на патниците од втората класа на најпознатиот брод што некогаш запловил по морињата. Тој ги опишува бродот, патниците и начинот на кој го поминувале времето. А сепак, само нешто повеќе од четири дена подоцна, Титаник лежеше на дното на Северниот Атлантик“, рекол Олдриџ.