Бенисио дел Торо откри дека за време на снимањето на криминалистичкиот трилер „Дивјаци“ (Savages) морал да претрпи 17 вистински шлаканици од својата колешка Салма Хајек, која, според него, толку сериозно ѝ пристапила на улогата што дел од сцените ги извела без дублер, пишува „Фар аут“.
Филмот на Оливер Стоун, снимен според романот на Дон Винслоу, ги следи двајцата американски одгледувачи на канабис, кои ги играат Арон Тејлор-Џонсон и Тејлор Кич, а кои се вплеткуваат во опасен конфликт со мексикански наркокартел. Дел Торо го толкува ликот на суровиот извршител на картелот, додека Хајек ја игра неговата лидерка, во една од најинтензивните улоги во својата кариера.
Во интервју, Дел Торо се присети на снимањето на една од најнапнатите сцени и призна дека ударите што ги добил не биле глумени.
„Да добијам 17 шлаканици од Салма, жена која доаѓа од земја што дала толку многу големи боксери, воопшто не беше пријатно“, се пошегува актерот.
Иако тоа го кажа низ смеа, Дел Торо нагласи дека Хајек целосно се внесувала во ликот и не избегнувала физички напорни сцени.
„Дивјаци“ беше важен филм и за Тејлор Кич, кој по комерцијалните неуспеси на „Џон Картер“ (John Carter) и „Брод за битки“ (Battleship) конечно доби можност да го покаже својот актерски потенцијал. Подоцна тој изгради успешна кариера со улоги во криминалистичките серии „Вејко“ (Waco) и „Вистински детектив“ (True Detective).
За режисерот Оливер Стоун, „Дивјаци“ претставуваше обид да се врати на мрачните криминалистички приказни што го прославија во претходните децении. Иако филмот не го означи неговото големо враќање, остана запаметен по суровиот тон, црниот хумор и силните актерски изведби, особено на Бенисио дел Торо и Салма Хајек.
