Норт Вест, 13-годишната ќерка на Ким Кардашијан (45) и Кание Вест (49), повторно успеа да ја шокира јавноста и да поттикне лавина од дебати за границите на модата и телесното украсување кај тинејџерите. Младата ѕвезда, која на само 13 години веќе има огромно влијание на социјалните мрежи, стана главна тема на интернет откако ги покажа необичните пирсинзи на рацете и прстите.

Норт дури му посвети и музички сингл на овој тренд, со симболичниот наслов „Piercing on My Hand“. Изгледот на нејзините раце, преполни со метални украси, предизвика вистински хаос на „TikTok“, каде што многумина се прашуваат дали станува збор за привремени или трајни пирсинзи.

Нејзината мајка, Ким Кардашијан, веднаш застана во одбрана на стилот на својата ќерка, истакнувајќи дека Норт уште од најрана возраст сака да експериментира со својот изглед.

„Отсекогаш сакаше лажни пирсинзи на септумот и плетенки во различни бои. Таа едноставно е таква и јас ѝ помагам да биде своја“, изјави Ким.

Сепак, трендот на украсување на телото со пирсинзи наиде на остри критики од медицинските експерти.

Лекарите предупредуваат на потенцијално опасни последици

Познатиот дерматолог Кори Хартман (51), основач на клиниката „Skin Wellness Dermatology“, предупреди на сериозните последици што можат да произлезат од ваквите интервенции, особено кога станува збор за рацете, кои постојано се изложени на нечистотии и бактерии.

Докторот нагласува дека ваквите модификации можат да предизвикаат инфекции, сериозни лузни и хиперпигментација. Уште позагрижувачки е тоа што, доколку пирсингот навлезе подлабоко од кожата, може трајно да ги оштети тетивите и да влијае врз нормалната функција на дланката.

Неговата препорака е кратка и јасна:

„Едноставно немојте да го правите тоа пред да наполните 18 години.“