Францускиот претседател Емануел Макрон на официјалната посета во Анкара се обиде да ја бакне раката на турската прва дама Емине Ердоган, но нејзината реакција и повлекувањето на раката предизвикаа вирална снимка и поттикнаа дискусии за локалните дипломатски обичаи.
Обидот на францускиот претседател, Емануел Макрон, да покаже почит кон турската прва дама, Емине Ердоган, се претвори во незгоден момент што ја засени неговата официјална посета на Анкара.
Иако главната причина за неговото доаѓање беше дводневниот самит на НАТО посветен на зајакнување на европската безбедност, вниманието на јавноста го привлече снимка од нивниот состанок, која покажа како дипломатските обичаи можат да се разликуваат од земја до земја.
За време на состанокот на државниците и нивните сопруги, Макрон се обиде да ја бакне раката на Емине Ердоган, што во некои култури се смета за знак на почит и учтивост. Сепак, снимката покажа како турската прва дама ја повлече раката во тој момент, јасно ставајќи до знаење дека не сака таков гест.
Снимката повторно го отвори прашањето колку е важно да се познаваат локалните обичаи на дипломатските состаноци. Додека бакнувањето на раката е традиционален знак на галантност и почит во некои европски кругови, во турски контекст таков гест може да се разбере поинаку.
Експертите за дипломатски протокол истакнуваат дека во Турција, под влијание на отоманската традиција и исламските обичаи, воздржаноста и формалноста повеќе се вреднуваат. Затоа, гестовите што изгледаат учтиво или свечено во другите култури можеби не секогаш се добро прифатени.
фото/ЕПА
