Токму тоа се случи деновиве во Дубаи, каде што по повеќе од 30 години повторно заедно се појавија Кораима Торес и Освалдо Риос, актерскиот пар што ја одбележа култната венецуелска теленовела „Касандра“. Фотографиите од церемонијата го обиколија светот, а социјалните мрежи беа преплавени со коментари од обожаватели од земјите во кои оваа серија стекна култен статус.

Нивната средба не беше само носталгичен момент за публиката. И двајцата во Дубаи го добија престижното признание „Top Humanity Leaders Award“, кое им се доделува на поединци за нивната хуманитарна работа и придонесот кон општеството.

„Касандра“ му го промени животот, а наградата ѝ ја посвети на Венецуела

Најемотивниот момент на вечерта се случи кога Риос се искачи на сцената за да го прими признанието.

Порториканскиот актер им се заблагодари на организаторите и домаќините во Обединетите Арапски Емирати, но порача дека ова признание за него има многу подлабоко значење.

Тој наградата ѝ ја посвети на Венецуела, земјата за која вели дека е негова втора татковина и каде што ја снимал серијата „Касандра“, улогата што ја одбележа неговата кариера и му донесе светска популарност.

Посебно ја спомена и прочуената писателка Делија Фијало, авторката на „Касандра“, истакнувајќи дека без неа оваа теленовела никогаш немаше да постои.

Наградата ја посвети и на својот роден Порторико, како и на сите свои сонародници, а говорот го заврши со зборовите на легендарниот бејзбол играч Роберто Клементе:

„Ако имате можност да му помогнете на човештвото, а не го направите тоа, го трошите своето време на оваа планета“.

Неговите зборови предизвикаа бројни реакции на социјалните мрежи, каде што многумина напишаа дека токму тој дел од говорот најмногу ги трогнал.

Серијата што стана светски феномен

Кога „Касандра“ се појави на почетокот на деведесеттите години, малкумина можеле да претпостават дека ќе стане една од најгледаните теленовели на сите времиња.

Серијата беше емитувана во повеќе од 120 земји, а преведена е на десетици јазици и запишана во Гинисовата книга на рекорди како една од најраспространетите латиноамерикански теленовели. Посебна популарност стекна на Балканот, во Русија, Кина, Грција, Италија, но и во бројни арапски земји, каде што и денес има верна публика.

Затоа не изненадува што заедничкото појавување на Кораима Торес и Освалдо Риос предизвика толку многу емоции. Иако и двајцата продолжија со успешни актерски кариери, ретко присуствуваа заедно на јавни настани, па новите фотографии многумина ги вратија во времето кога Касандра и Игнасио беа еден од најомилените телевизиски парови.

За публиката која порасна со „Касандра“, ова не беше само средба на двајца актери, туку потсетување на серијата што одбележа една цела генерација.