Експертите за патувања од компанијата „First Choice Holidays“ им советуваат на Британците да ги заменат преполните европски плажи со уживање на црниот вулкански песок на Мадеира. Станува збор за мал португалски остров кој може да се пофали со спектакуларни пејзажи, суптропска клима и релативно поволни цени.
Една плажа посебно стана вирална поради својот речиси нереален изглед. Плажата Сејшал (Seixal), на северниот брег на Мадеира, се смета за едно од најубавите места на островот, а особено е интересна поради спојот на црн вулкански песок, карпи обраснати со бујно зеленило и водопади кои директно се слеваат во Атлантскиот Океан. Затоа на TikTok ја нарекоа „европски Хаваи“, а илјадници видеа и фотографии од оваа локација наведоа некои корисници да се запрашаат дали сцените што ги гледаат воопшто се реални или се направени со помош на вештачка интелигенција.
„Кога луѓето помислуваат на вулкански острови и плажи со црн песок, најчесто прво помислуваат на Хаваи. Она што многу патници ги изненадува е тоа што слични пејзажи можат да се најдат многу поблиску до Европа. Мадеира нуди спектакуларни брегови, одлична гастрономија и активности на отворено во текот на целата година“, изјавил Кевин Нелсон, генерален директор на компанијата „First Choice“.
За разлика од многу популарни медитерански дестинации, овде нема големи гужви, ниту бескрајни редови високи хотели и густо распоредени лежалки.
„Додека патувањето од соништата на дестинации како Хаваи често чини и до 2.000 фунти по лице за лет и сместување, Мадеира нуди седумдневни аранжмани од околу 503 фунти по лице, со вклучен лет и сместување, кратко траење на летот и без временска разлика (џет-лег)“, пишува „Daily Mail“.
И трошоците за живот на островот се релативно пристапни во споредба со многу западноевропски летувалишта.
Локално точено пиво обично чини околу 2,50 евра, додека оброк во поволен ресторан може да се најде за околу 12 евра. Вечера од три јадења за две лица во ресторан од средна категорија во просек чини околу 50 евра.
„Една од работите што најмногу ги изненадува посетителите на Мадеира е колку многу има да се види надвор од плажите – од природни базени од лава и древни ловорови шуми, до возење со теренски возила низ лозја, планински села и видиковци долж брегот“, изјавил Тејлор Маршал, менаџер во компанијата „First Choice“.
„Би препорачал посета на северот од островот, во Сао Висенте, каде ќе најдете традиционални ресторани што служат локални специјалитети како што се „espetada“ ражничи печени на ловорово дрво, гриловани морски полжави и свежа атлантска риба. Ресторанот „Las Caraibas“, во близина на Сејшал, е познат по морските плодови и прекрасниот поглед на брегот. Посетителите задолжително треба да пробаат понча – најпознатиот пијалок на Мадеира и важен дел од островската култура“, предлага тој.
