Американскиот претседател Доналд Трамп продолжи со напади кон италијанската премиерка Џорџа Мелони, тврдејќи дека таа барала да се фотографира со него за да го крене својот рејтинг, додека Мелони ги отфрла неговите обвинувања и ја нарекува јавната расправија бесмислена.
Американскиот претседател, Доналд Трамп, продолжи со вербалните напади кон италијанската премиерка Џорџа Мелони, тврдејќи на својата социјална мрежа Truth Social дека таа постојано барала да се фотографира со него за време на неодамнешниот Самит на Г7. Мелони неговите тврдења ги нарече „бесмислени и неиспровоцирани напади“, продолжувајќи ја јавната расправија што започна претходно оваа недела.
Во денешната објава, Трамп ги повтори обвинувањата и ги поврза со, како што тврди, падот на популарноста на италијанската премиерка и нејзината надворешна политика.
„Италијанската премиерка Џорџа Мелони за време на Самитот на Г7 во Франција постојано бараше да се фотографира со мене“
„Не ѝ оди добро во Италија, популарноста ѝ е ниска, можеби затоа што им го сврте грбот на Соединетите Американски Држави, земјата која искрено ја сака и ја штити Италија кога станува збор за спречување на Иран да дојде до нуклеарно оружје.“
Тој додаде дека, според него, откако САД го поразиле Иран, Мелони повторно сакала да биде негов пријател за да ѝ порасне поддршката кај гласачите.
„Сега, откако Соединетите Држави воено го поразија Иран, таа повторно би сакала да биде пријателка за да ѝ пораснат бројките. Не, благодарам!“, напиша Трамп.
Мелони возврати преку објава на Инстаграм, отфрлајќи ги неговите тврдења.
„Овие постојани, неиспровоцирани напади се бесмислени“, напиша таа. „Што се однесува до мојата популарност, пријателството со вас сигурно не ми помогнало, а мојот рејтинг не зависи од односот со вас.“
Јавната расправија почна по Самитот на Г7 во Франција
Кога Трамп изјави за италијански новинар дека му било жал за Мелони бидејќи, како што рече, го молела да се фотографира со него. Премиерката уште вчера реагираше со видео на социјалните мрежи, оценувајќи дека тврдењата на Трамп се целосно измислени и порача дека „ниту таа ниту Италија никого не молат за ништо“.
Односите меѓу двајцата лидери се влошија
Особено по одбивањето на Рим да ги поддржи американските операции против Иран и по поддршката што Мелони му ја даде на папата Лав XIV, кого администрацијата на Трамп го критикуваше поради неговите ставови за војната и американската имиграциска политика.
