Сите што имале можност да го гледаат на голот го паметат Петар Чех како фантастичен голман, а нема да бидат малкумина оние што дури ќе кажат дека го сметаат за најдобар на сите времиња.

Чех, кој најдобрите години од кариерата ги мина бранејќи за Челзи, клуб со кој освои четири титули во Премиер лигата и една титула во Лигата на шампионите, по завршувањето на кариерата реши повеќе да му се посвети на своето хоби, со кое активно почнал да се занимава уште додека бил на врвот од својата кариера.

Почнал да свири тапани пред 15 години

Станува збор за свирење тапани. Чех веќе подолго време на својот „YouTube“ канал објавува видеа на кои изведува различни познати песни, а сега прифати еден навистина интересен предизвик.

На најпознатиот тапанарски „YouTube“ канал, „Drumeo“, Чех доби задача да се обиде да отсвири песна што никогаш претходно не ја слушнал. Откако откри дека некои од песните што му ги пуштиле веќе ги познава, организаторите му ја пуштија песната "Separate Ways" од групата „Journey“, која имаше кратко време да ја увежба, а потоа и да ја изведе со музичка подлога – секако оригиналната верзија, но без тапаните.

Чех храбро го прифати предизвикот и задачата ја заврши навистина добро. Во секој случај, погледнете сами. Можеби не е толку извонреден зад тапаните колку што беше на голот, бидејќи таму беше навистина величествен, но и за ова заслужува големи пофалби. Пред сè, за вакво нешто се потребни многу вежбање, посветеност и огромна волја.

Под ова видео можете да погледнете и некои од изведбите што ги објавувал на својот канал.