Како што пренесуваат странските медиуми, во лондонското кино за најновиот филм на Нолан за само 24 часа биле продадени околу 28.000 билети, со вкупна заработка од еден милион долари (околу 865.000 евра). Со тоа е соборен досегашниот рекорд за продажба на билети во првиот ден во тоа кино.

Овој успех се надоврзува на фактот дека првите четири проекции за премиерниот викенд, вклучувајќи ја и специјалната полноќна проекција со која започнува 24-часовното непрекинато прикажување, биле распродадени за помалку од еден час.

Приходот на „Одисеја“ во првите 24 часа во „BFI IMAX“ повеќе од двојно го надмина претходниот рекорд што го држеше „Дина: Втор дел“ (423.000 евра), а е речиси четирипати поголем од заработката на „Опенхајмер“ на Кристофер Нолан во истиот временски период (293.000 евра).

Рекорди се бележат и од другата страна на Атлантикот

Голем интерес е забележан и во Соединетите Американски Држави. Билетите за премиум форматите беа пуштени во претпродажба уште во 2025 година, а во првите 24 часа беа продадени речиси 150.000 билети, со приход од 3,4 милиони долари (околу 2,93 милиони евра).

Станува збор за највисок износ на почетна претпродажба во последните четири години. Огромната побарувачка доведе до падови и забавување на онлајн-системите за продажба на билети, додека на платформите за претпродажба некои билети се нудеа и по цена до 1.300 евра.

Импресивна актерска екипа и технолошка пресвртница

„Одисеја“ на Нолан обединува ѕвездена актерска екипа во која се Мет Дејмон, Зендеја, Роберт Патинсон, Том Холанд, Ен Хатавеј, Лупита Нионго и Шарлиз Терон.

Филмот воедно е и првиот проект во историјата што е целосно снимен со „IMAX 70“ мм камери, што дополнително го зголемува интересот на публиката за прикажување во најголемите и технолошки најнапредните кина.

Светската премиера на „Одисеја“ е закажана за 17 јули, а судејќи според досегашните бројки, новиот филм на Нолан уште пред неговото прикажување си обезбеди статус на еден од најочекуваните кино-хитови на годината.