Толку е посебна што мештаните не сакаат многу да зборуваат за неа, а оние кои ја посетиле често велат дека изгледа како сцена од разгледница од тропски рај.

Станува збор за плажата Жуковица, скриена во заливите на полуостровот Луштица, далеку од бучавата, метежот и редиците за лежалки. За разлика од најпознатите туристички места на Јадранот, Жуковица не е плажа на која случајно ќе налетате додека шетате.

Токму поради тоа успеала да го зачува она што денес е највредно на приморјето — мирот и недопрената природа.

Сместена меѓу карпи и зеленило, оваа мало заливче воодушевува со неверојатно чистата вода, која на сонце добива нијанси на тиркизна и смарагдна боја.

Фотографиите од ова место често предизвикуваат неверување на социјалните мрежи, бидејќи многумина не можат да поверуваат дека вакви глетки постојат во Црна Гора.

„Поубаво од Малдивите“

Споредбата со Малдивите можеби звучи претенциозно, но оние кои ја посетиле Жуковица имаат свои аргументи.

Кристално чистата вода, речиси недопреното крајбрежје, отсуството на големи хотелски комплекси и чувството на целосна изолираност создаваат впечаток како да сте далеку од Европа.

Кога морето е мирно, дното се гледа речиси до најситниот детаљ, а боите на водата потсетуваат на егзотични дестинации што ги гледаме во туристичките брошури.

Токму затоа многу патници тврдат дека ова е едно од ретките места на Јадранот што сè уште не го изгубило својот природен шарм.

Таму нема метеж, бучава ниту комерцијализација

Она што ја издвојува Жуковица од бројните популарни плажи е фактот дека не потклекнала на масовниот туризам.

Нема гласна музика, нема редици за паркинг, ниту големи угостителски објекти што го заземаат секој слободен метар од брегот. Посетителите доаѓаат пред сè поради природата, капењето и чувството дека пронашле место кое сè уште не станало жртва на туристичката експанзија. Многумина токму во тоа ја гледаат нејзината најголема вредност.

Како да стигнете до плажата Жуковица?

До плажата може да се стигне од правец на Луштица, а последниот дел од патот бара малку повеќе трпение, бидејќи не станува збор за типична градска плажа со уреден пристап. Интересно е што некогаш до неа главно се стигнувало со чамец, а денес постои и пристап преку макадамски пат од правец на селото Главатичиќи.

Патот е незгоден и нема баш добро обележан патоказ, но ако прашате кој било случаен минувач, точно ќе знае да ве упати кон дестинацијата. Ова е една мини авантура, бидејќи патот е едвај прооден, а оние со ниски автомобили можат да доживеат „нервен слом“.

Сепак, оние кои ќе решат да тргнат во потрага по овој скриен бисер, главно се согласуваат во едно — трудот повеќекратно се исплаќа.

Место што сè уште му одолева на масовниот туризам

Во време кога најубавите локации многу брзо се претвораат во вирални хитови и се полнат со туристи, Жуковица успева да ја зачува аурата на скриена оаза.

Можеби токму затоа многу Црногорци на шега велат дека најмногу би сакале што помалку луѓе да дознаат за неа. Не затоа што не сакаат гости, туку затоа што стравуваат дека преголемата популарност би можела да го наруши она поради што оваа плажа е толку посебна.

За оние кои трагаат по недопрена природа, кристално чисто море и глетки што изгледаат како да пристигнале од некоја егзотична дестинација надвор од границите на нашиот континент, Жуковица е место што вреди да се запише на листата на летни желби.