Денес ви претставуваме едно такво јадење, кое се приготвува брзо и не бара долго да стоите покрај шпоретот. Сè што треба да направите е да ги испржите компирите, да измешате неколку состојки што веројатно ги имате во кујната, а потоа да ги полеете компирите со вкусен сос и ќе добиете сочно јадење совршено и за ручек и за вечера во топлите денови.

Ако не сте љубители на магдонос, слободно експериментирајте со зачини, а тешко дека ќе погрешите ако додадете босилек, мајчина душица, оригано…

Состојки:

✔️2 големи компири

✔️4 јајца

✔️200 мл густ јогурт или кисело млеко

✔️масло по потреба

✔️мелен пипер

✔️5 чери домати

✔️млад кромид

✔️чедар

✔️магдонос

✔️сол и црн пипер.

Подготовка:

Излупете ги компирите и исечете ги на кругови, потоа со повремено мешање пропржете ги во малку масло и кон крајот додадете мелен пипер.

Изматете ги јајцата, потоа додадете ситно исечкани чери домати и млад кромид, потоа зачини и кисело млеко или јогурт.

Сè добро измешајте, па со смесата полејте ги пржените компири во тавата. Повремено подвлечете ја шпатулата под компирите за да не се залепат.

Откако ќе се испечат од едната страна, внимателно превртете ги за да се испечат и од другата страна.

Кога е речиси готово, изрендајте чедар сирење одозгора и додадете сечкан магдонос.