Станува збор за еден вид „тивок рејв“ во зори, односно масовно трчање со музика на слушалки, кое многу брзо стана вирален хит, пишува „NY Post“.

„Silent Disco Run“ во 5:30 часот наутро

Снимките од необичниот настан се проширија на социјалните мрежи, а прикажуваат голема група луѓе како во 5:30 часот наутро трчаат по познатата патека во Кангу. Станува збор за тесна патека што минува низ едни од најпрепознатливите оризови полиња на Бали.

Настанот го организира локалната заедница „Entourage Bali“, која го претставува како прв клуб за „Silent Disco Run“ на островот. Со тоа Бали, веќе познат како омилена дестинација за дигитални номади, туристи и љубители на здравиот живот, доби уште една активност што совршено се вклопува во неговата необична мешавина од велнес, забава и социјални мрежи.

Организаторите се пофалија со успехот на Инстаграм, објавувајќи видео со опис: „Повеќе од 100 луѓе. 5:30 часот наутро. Надвор сè уште е темно. Диџеј во автомобил го водеше нашиот тркачки клуб кон изгрејсонцето на Бали“.

На снимките можат да се видат мноштво луѓе како трчаат кон изгрејсонцето, мавтаат со рацете, танцуваат и се движат во ритамот на музиката што само тие ја слушаат преку слушалки.

Организаторите опишаа како изгледала атмосферата на настанот. „Масата целосно полуде бидејќи на камионот имавме диџеј и водител кои ја подигаа атмосферата“, порачаа тие.

Објаснија и дека концептот е осмислен така што да биде достапен за сите.

„Нашите трчања се бесплатни и не се потребни пријави, па затоа се достапни за сите, вклучувајќи ја и локалната заедница. Би рекол дека овој пат имаше приближно 75 отсто дигитални номади и странци и 25 отсто локално население“, додадоа тие.

Бали повторно ги диктира трендовите

Организаторите тврдат дека ваквите настани сè повеќе го потврдуваат статусот на Бали како место каде што се раѓаат нови трендови во фитнесот, здравјето и начинот на живот. „Нема друго место за започнување нешто вакво освен Бали“, изјавија тие за „news.com.au“.

Додадоа дека островот сè повеќе станува предводник кога станува збор за фитнесот, велнесот, животниот стил и настаните што ја обединуваат заедницата.

Сокови, печива и критики

По трчањето, учесниците го завршиле утрото со сокови и печива од популарниот локален локал „Atelier Sandwich“, познат по гурманските сендвичи.

Иако настанот главно наишол на позитивни реакции, сите не биле воодушевени. Едно лице коментирало: „По 20 години овде, тажно е да се види колку паднало нивото на свест“.

Сепак, многумина веднаш почнале да прашуваат кога ќе се одржи следното трчање. Организаторите веќе најавија дека утринскиот рејв „наскоро продолжува“.