Снимките од огромните гужви на бреговите на една од најпознатите светски дестинации предизвикаа сериозна загриженост поради масовниот туризам. Островите Ко Пи Пи на Тајланд, познати по пејзажите што оставаат без здив, денес сè почесто изгледаат далеку од идилично.
Наместо рајска плажа, посетителите ги пречекува сцена што повеќе наликува на кошмар.
Прославен со филм, уништен од туризам
Островите во Андаманското Море, со своите драматични варовнички карпи, заливи со бел песок и тиркизно море, отсекогаш привлекувале посетители. Но, нивната популарност експлодираше по филмот „The Beach“ на режисерот Дени Бојл, во кој главната улога ја играше Леонардо Дикаприо.
Успехот на филмот, за жал, се покажал кобен за заливот Маја на островот Ко Пи Пи Ле, каде што бил сниман. Секоја година таму пристигнува огромен број туристи кои сакаат да се искапат во нереално синото море и да се сончаат на славната плажа.
„Каков кошмар“
Реалноста денес е целосно поинаква од рајската сцена од филмот. Неодамнешна снимка што се прошири на социјалните мрежи прикажува стотици туристи збиени едни до други во близина на пристаништето, уште пред пристигнувањето во заливот Маја.
Видеото на Редит, каде што и беше објавено, предизвика лавина негативни коментари. „Апсолутно ништо таму не изгледа забавно“, напиша еден корисник. Друг додаде: „Воопшто не вреди да се оди. Бев минатиот месец и имаше толкава гужва што едноставно не беше забавно. Воопшто“. Трет кратко заклучи: „Каков кошмар“.
Неуспешни обиди за запирање на штетата
Туристичката компанија „Koh Tours“, која организира тури низ архипелагот, истакнува дека обидите да се ограничи прекумерниот туризам се покажале исклучително тешки.
„Ко Пи Пи Ле, помалиот ненаселен остров каде што се наоѓа заливот Маја, беше затворен три години откако туризмот, поттикнат од филмот ‘The Beach’, ги уништи коралите и ја загрози локалната популација на ајкули“, наведуваат од компанијата.
Островот повторно беше отворен во јануари 2022 година, но со низа ограничувања: ограничено време на престој, ограничен број бродови, забрана за ноќевање и забрана за користење креми за сончање во водата.
„Ситуацијата е подобра отколку во 2018 година, но таму и понатаму нема мир. Дури и кога бројот на посетители е ограничен на неколку стотици одеднаш, тоа повторно значи дека стотици луѓе стојат во истиот плиток залив“, објаснуваат тие.
Ништо подобра не е состојбата ни на главниот остров од архипелагот, Ко Пи Пи Дон, кој исто така страда од огромни гужви и, како што велат од компанијата, „навистина е пренатрупан“, со повеќе пешаци на квадратен метар отколку во повеќето тајландски градови.
Потрага по алтернативи
Џуб Јата, менаџерка за дестинации во компанијата „Intrepid Travel“, специјализирана за одржлив туризам, предупредува колку ситуацијата во заливот Маја станала проблематична.
„Во моментов сè изгледа така што само доаѓате, се фотографирате и мора да си заминете. Сите сакаат да ја видат плажата од филмот на Дикаприо. Прекрасна е, тоа не можам да го негирам, но едноставно има премногу луѓе“, изјави таа.
Нејзината компанија се обидува туристите да ги води поодговорно, избегнувајќи ги преоптоварените локации. Последниве години тоа значи посети на помалку познати, но подеднакво убави острови како Ко Тап, Ко Пода и Ко Каи.
Ко Тап е познат по феноменот „поделено море“, песочен гребен што се појавува за време на осека и спојува три острови. Ко Пода, од друга страна, е исклучително мирно место што еден патник го опишал како „пуст остров од Робинзон Крусо“. Ко Каи, во близина на Пукет, нуди прекрасни плажи идеални за нуркање и пливање, како и бегство од неподносливите гужви што го преплавија славниот залив Маја.
Денес
