Ако досега сте се грижеле за здравјето на срцето или дигестивниот систем, време е вниманието да го насочите и кон бубрезите – органи кои непрекинато работат за да ја одржуваат рамнотежата во телото. Редовното внесување вода е клучно за спречување оштетување на бубрезите, појава на камења во бубрезите и уринарни инфекции. Добрата хидратација го намалува оптоварувањето на бубрежната функција и помага во превенција на низа здравствени проблеми.
„Бубрезите ги отстрануваат отпадните материи, спречуваат губење на корисни супстанции од телото, ја одржуваат pH рамнотежата, го активираат витаминот D во употреблива форма и му помагаат на телото во создавањето црвени крвни клетки“, објаснува за „EatingWell“ диететичарката Мелани Бец.
Кога состојбата на бубрезите се влошува, се нарушува и целокупното здравје. „Се проценува дека повеќе од 37 милиони Американци имаат хронична бубрежна болест“, вели Џен Хернандез, диететичарка специјализирана за здравје на бубрезите. „Дури девет од десет возрасни лица со оваа болест не знаат дека ја имаат, бидејќи раната фаза најчесто поминува без симптоми.“
Иако постојат многу начини за зачувување на здравјето на бубрезите, лекарите се согласуваат дека добрата хидратација е една од најважните.
Намален проток на крв во бубрезите
Бубрезите секојдневно филтрираат околу 200 литри крв, а за непречен проток им е потребна вода. Кога нивото на хидратација паѓа, крвта станува поконцентрирана со отпадни материи, а помала количина крв поминува низ бубрезите.
„Бубрезите реагираат така што се обидуваат да зачуваат што е можно повеќе вода, што значи дека урината станува поконцентрирана, а тие работат под поголем притисок за да ја одржат рамнотежата“, објаснува Хернандез.
Ако бубрезите не можат ефикасно да ги филтрираат отпадните материи, може да дојде до акутно оштетување на бубрезите, кое понекогаш предизвикува и трајни последици.
Иако секој може да доживее оштетување на бубрезите поради дехидратација, „ризикот е поголем кај лица кои редовно користат нестероидни антиинфламаторни лекови“, предупредува доктор Тим Пфледерер.
Може да се создадат камења во бубрезите
Секој што почувствувал болка од камен во бубрег знае колку е непријатна таа состојба. Минералите и солите во урината можат да се соединат и да создадат тврди наслаги – од големина на зрно песок, па сè до големина на топче за голф во ретки случаи.
„Кога урината станува премногу концентрирана, минералите како калциум и оксалати полесно кристализираат и создаваат камења“, наведува Хернандез.
Ако вие или некој од вашето семејство имал проблем со камења во бубрезите, Пфледерер препорачува внесување големи количини вода за превенција. Најмалку 2,5 литри вода дневно може значително да помогнат, бидејќи урината останува разредена.
Поголем ризик од уринарни инфекции
Жените од сите возрасти, како и постарите лица, имаат зголемен ризик од уринарни инфекции. До нив доаѓа кога бактериите се размножуваат во уринарниот тракт, а ако не се лекуваат, може да предизвикаат и компликации на бубрезите.
Иако дехидратацијата не е директна причина, таа значително го зголемува ризикот.
„Кога поради дехидратација се намалува излачувањето урина, бактериите имаат повеќе време да се задржат и размножуваат во уринарниот систем, со што расте ризикот од инфекција која може да го оштети бубрежното ткиво“, вели Пфледерер.
Повеќето уринарни инфекции лесно се лекуваат со антибиотици, но честите инфекции можат да предизвикаат трајни оштетувања.
„Многумина не знаат дека хроничните и повторувачки уринарни инфекции со текот на времето можат да предизвикаат трајни воспаленија и лузни на бубрезите, што може да придонесе за развој или влошување на хронична бубрежна болест“, додава Хернандез.
Совети за подобра хидратација
Пиењето вода звучи едноставно, но за многумина претставува предизвик. За да останете хидрирани и да го зачувате здравјето на бубрезите, експертите препорачуваат неколку стратегии:
• Јадете храна богата со вода: Околу 20% од дневниот внес на течности доаѓа од храната. Свежото овошје и зеленчук, како лубеница, зелена салата, краставици и јагоди, содржат и до 90% вода.
• Подобрете го вкусот на водата: Ако ви е тешко да пиете обична вода, додадете свежо овошје, зеленчук или ароматични билки.
• Прилагодете го внесот според времето и активноста: Количината вода што му е потребна на телото варира во зависност од температурата и физичката активност.
• Секогаш носете вода со себе: Наједноставниот начин да внесувате повеќе течности е постојано да имате шише вода во близина.
Добрата хидратација не е важна само за жедта – таа е клучна за здравјето на целиот организам, а особено за правилната работа на бубрезите.
