Се наоѓа во Шчеќинскиот Залив и го носи името "Wyspa Jana Zabawy-Wroblewskiego", но наместо да биде претворен во комерцијална зона, веднаш бил затворен за јавноста.

Поттикнување на биодиверзитетот

Денес, научниците набљудуваат како природата постепено го презема овој остров, претворајќи го во засолниште за птици и диви животни, пренесува „Times of India“.

Овој проект покажува како индустриската инфраструктура може да се искористи за поттикнување на биодиверзитетот и создавање клучни живеалишта за загрозени видови.

Островот бил формиран со насипување огромни количества песок, при продлабочувањето на пловниот канал Шчеќин – Свиноујшче, кој овозможил товарните бродови полесно да пристигнуваат до пристаништето Шчеќин, во северозападна Полска.

Во текот на реализацијата на проектот, инженерите отстраниле милиони кубни метри песок и седименти од пловниот пат. Наместо материјалот да биде депониран на друга локација, полските власти го искористиле за изградба на вештачки остров.

„Еколошко нарушување“

Островот бил завршен во 2021 година и зафаќа околу 180 хектари, протегајќи се на приближно 1,2 километри во најширокиот дел. Пристапот за јавноста е забранет, бидејќи островот е наменет како безбедно живеалиште за ретки водни птици и чувствителни мочуришни екосистеми.

Експертите за заштита на животната средина го гледале овој проект како можност да се надомести дел од „еколошкото нарушување“ предизвикано од ископувањето на морското дно.

Со текот на времето, песочниот терен и плитките води околу островот почнале да привлекуваат галеби и други видови птици кои бараат мирни места за гнездење. Наместо патишта, хотели или марини, островот намерно бил оставен речиси недопрен, за дивиот свет постепено сам да се воспостави.

Научниците го опишуваат островот како редок пример за создавање екосистем речиси од нула.

Ретка можност за научниците

Кога проектот бил завршен, островот главно бил составен од песок и седименти. Оттогаш, растенијата, инсектите и популациите на птици постепено почнале да ја населуваат областа преку природен процес познат како – еколошка сукцесија.

Истражувачите особено ги интересира колку брзо птиците се приспособуваат на новите живеалишта во балтичкиот регион, каде крајбрежните екосистеми долго време биле менувани од индустријата, поморскиот сообраќај и урбаното ширење.

Бидејќи човечкото присуство на островот е минимално, научниците имаат ретка можност да набљудуваат како се однесува дивиот свет кога му е обезбеден заштитен простор за природен развој.