Научници од Сибирскиот државен универзитет за наука и технологија развиле и патентирале перспективен материјал за градежништво и дизајн, односно „проѕирно дрво“, соопшти руското Министерство за образование и наука.
Тие осмислиле производство на материјал што ја комбинира природната естетика на дрвото, неговата цврстина и способноста да пропушта светлина, што отвора нови можности за користење на дрвото во градежништвото, уредувањето ентериери и создавањето современи завршни материјали, пренесе ТАСС.
Како што се наведува, материјалот е направен од дрвена основа која минува низ процеси на делигнификација и белење, а потоа се третира со посебно средство за импрегнација.
Како резултат на тоа, дрвото добива висока оптичка пропустливост, а истовремено ја задржува својата природна структура и механичка цврстина. За овој развој веќе е одобрен патент.
„Проѕирното дрво комбинира издржливост, сигурност и впечатливи декоративни својства, што го прави погодно за широк спектар на примена. Проѕирното дрво може да се користи за изработка на панели, прегради, мебел и украсни елементи кои создаваат меко, дифузно осветлување и поудобна и естетски попријатна средина“, стои во соопштението на руското Министерство за образование и наука.
Како што е наведено, предност е и заштедата на енергија, бидејќи проѕирното дрво овозможува дневната светлина да влегува во зградите, намалувајќи ја потребата од вештачко осветлување во текот на денот.
