Овој словенечки град е на само еден час возење од Загреб, а во него ве очекува вистински рај: мирна река со најубава сина боја, најзелени брегови, симпатични мостчиња и град толку мал и сладок што неговото јадро можете да го прошетате за најмногу половина час, пишува „putnikofer.hr“. Тој рај се вика Костањевица на Крка – најмалиот град во Словенија и единствениот во земјата што се наоѓа на остров.

„Словенечка Венеција“ без метеж

Го фалат како „најмалото место за најголеми доживувања“, а поради тамошните мостови и „животот на и покрај водата“, градот често го нарекуваат „Словенечка Венеција“.

Но, таму ја нема величествена Дуждова палата, гондоли ниту плоштадот Свети Марко. Таму, во Костањевица на Крка, сè е некако скромно и на прв поглед ненаметливо, тивко и питомо како и самата река покрај која живее ова гратче со околу 700 постојани жители.

Реката Крка, најдолгата десна притока на Сава во Словенија и по Савиња втората најдолга река во Словенија што извира, но и завршува во таа земја, овде го има „главниот збор“.

Јадрото на градот во прегратките на Крка

Имено, јадрото на преслатката Костањевица на Крка се наоѓа буквално во прегратките на оваа река, односно на вештачки остров создаден во нејзиниот меандер.

Во овој град, едноставно, нема друг избор — ќе влезете преку мост, а тој може да се пофали со неколку мостови и на северната и на јужната страна на градот.

Костањевица на Крка е исклучително едноставен град по својот распоред. Нема шанси да се изгубите во него. Имено, на островот постојат две паралелни улици, меѓусебно поврзани со помали. Прошетката тука е една од оние безгрижни и опуштени, покрај зданија од кои некои денес се наменети за сместување туристи.

Тие две главни во градот се викаат Улица талцев и Оражнова улица, а понекогаш ги нарекуваат и Голем и Мал плац.

При посета на Костањевица на Крка, неизбежно е да зачекорите по некоја од нив, а веројатно и по двете.

Словенија каква што ја гледаме на разгледници

Како што пишуваат новинарите на „putnikofer“, тие ги посетиле и двете, а своето среќно место во градот го пронашле на неговиот југ, преку мостот, во градскиот парк на брегот на реката Крка.

Тоа била словенечка идила каква што сите ја замислуваме – неверојатни нијанси на зелена и сина боја, мир и опуштеност, луѓе кои уживаат во погледот кон реката и јадат сладолед, велосипедисти на пауза, деца што разиграно си играат во паркот… Сè некако на свое место, сè како што треба да биде — пролетно и безгрижно.

Инаку овој мал град е интересен и поради неговото минато. Имено, за настанувањето на Костањевица на Крка пресудна била корушката династија Шпајнхајм, која на почетокот на 12 век, со цел да ги брани своите имоти, ја изградила тврдината Костањевица. Во тогашната реалност Костањевица била многу важна: таму се наоѓала ковачница за пари, но и манастир. Името Костањевица го добила дури во 1615 година; пред тоа најпрво ја нарекувале Ландестрост, а подоцна Ландштрас.